വിവിധ അന്താരാഷ്ട്ര ചലച്ചിത്ര മേളകളില്‍ അവാര്‍ഡുകള്‍ വാരിക്കൂട്ടിയ സജിന്‍ ബാബു ചിത്രം “ബിരിയാണി” മാര്‍ച്ച് 26-ന് തിയേറ്ററുകളില്‍ എത്തുന്നു. കനി കുസൃതി നായികയായ ചിത്രം മതപരമായ ദുരാചാരങ്ങള്‍ക്കെതിരെ പൊരുതുന്ന സ്ത്രീയുടെ കഥയാണ് പറയുന്നത്.
ചിത്രത്തിലെ പ്രകടനത്തിന് കനി കുസൃതിക്ക് മികച്ച നടിക്കുള്ള സംസ്ഥാന അവാര്‍ഡ് ലഭിച്ചിട്ടുണ്ട്. 2020 മുതല്‍ 50-ലേറെ ചലച്ചിത്ര മേളകളില്‍ പ്രദര്‍ശിപ്പിച്ചിട്ടുള്ള ബിരിയാണിക്ക് 20 ഓളം അവാര്‍ഡുകള്‍ ലഭിച്ചിട്ടുണ്ട്. അന്തരിച്ച നടന്‍ അനില്‍ നെടുമങ്ങാടും ചിത്രത്തില്‍ ഒരു പ്രധാന വേഷം ചെയ്തിട്ടുണ്ട്.
സജിന്‍ ബാബു തന്നെയാണ് ചിത്രത്തിന് കഥയും തിരക്കഥയും ഒരുക്കിയിരിക്കുന്നത്. യുഎഎന്‍ ഫിലിം ഹൗസ് നിര്‍മ്മിച്ചിരിക്കുന്ന ചിത്രത്തിന്റെ ഛായാഗ്രഹണം കാര്‍ത്തിക് മുത്തുകുമാര്‍ നിര്‍വ്വഹിക്കുന്നു. ലിയോ ടോം സംഗീത സംവിധാനവും അപ്പു എന്‍. ഭട്ടതിരി ചിത്രസംയോജനം നിര്‍വഹിച്ചിരിക്കുന്നു.
ഐഎഫ്എഫ്കെയില്‍ പ്രദര്‍ശിപ്പിച്ച ചിത്രത്തിന് മികച്ച പ്രതികരണം ലഭിച്ചിരുന്നു. പ്രേക്ഷകരില്‍ നിന്നും ചിത്രത്തിന് ലഭിച്ച പ്രതികരണം വളരെ പ്രചോദനകരമായിരുന്നുവെന്ന് സംവിധായകന്‍ സജിന്‍ ബാബു പറയുന്നത്. മേളയില്‍ പ്രദര്‍ശിപ്പിച്ച എല്ലാ ഷോയും ഹൗസ്ഫുള്ളായിരുന്നു.
Read more
തിയേറ്ററുകളിലും ബിരിയാണി സമാനമായി സ്വീകരിക്കുപ്പെടുമെന്നാണ് പ്രതീക്ഷയെന്നും സജിന്‍ ബാബു പറഞ്ഞു. റോമിലെ ഏഷ്യാറ്റിക്ക ഫിലിം ഫെസ്റ്റിവലിലാണ് ബിരിയാണി ആദ്യമായി പ്രദര്‍ശിപ്പിച്ചത്. അവിടെ മികച്ച സിനിമക്കുള്ള “നെറ്റ് പാക്ക്” അവാര്‍ഡ് ലഭിച്ചിട്ടുണ്ട്.
