നടന്‍ സൂര്യയ്ക്ക് വലിയൊരു ബ്രേക്ക് സമ്മാനിച്ച ചിത്രമാണ് ‘ഗജിനി’. സൂപ്പര്‍ ഹിറ്റ് ആയി മാറിയ ചിത്രം സംവിധായകന്‍ എആര്‍ മുരുഗദോസ് ഈ സിനിമ, ഇതേ പേരില്‍ തന്നെ ഹിന്ദി റീമേക്ക് ഒരുക്കിയിരുന്നു. ആമിര്‍ ഖാന്‍ നായകനായി എത്തിയ ‘ഗജിനി’യും ഹിറ്റ് ആയി മാറിയിരുന്നു. ഗജിനിക്ക് രണ്ടാം ഭാഗം ഒരുങ്ങുന്നുവെന്ന വാര്‍ത്തയാണ് ഇപ്പോള്‍ പുറത്തുവന്നിരിക്കുന്നത്.
നിര്‍മ്മാതാക്കളായ അല്ലു അരവിന്ദ്, മധു മണ്ടേന എന്നിവര്‍ രണ്ടാം ഭാഗം ഒരുക്കാനുള്ള പദ്ധതിയിലാണ്. ചിത്രം ഹിന്ദിയും തമിഴിലും ആമിര്‍ ഖാനെയും സൂര്യയെയും വച്ച് ഒരേ സമയം ഷൂട്ട് തുടങ്ങാനാണ് പദ്ധതി എന്നാണ് പിങ്ക്‌വില്ല റിപ്പോര്‍ട്ട് ചെയ്യുന്നത്. ഗജിനി 2വിന്റെ ആശയം സൂര്യയ്ക്കും ആമിര്‍ ഖാനും ഏറെ ഇഷ്ടപ്പെട്ടിട്ടുണ്ട്.
രണ്ട് പേരും വലിയ ആവേശത്തിലാണ് എന്നാണ് റിപ്പോര്‍ട്ടുകള്‍. എന്നാല്‍ സിനിമ ഒരു റീമേക്ക് ആക്കി മാറ്റാന്‍ ഇരുതാരങ്ങളും ഒരുക്കമല്ല. അതിനാലാണ് ഈ തീരുമാനം എന്നാണ് റിപ്പോര്‍ട്ട്. ചിത്രം ഒരേ സമയം റിലീസ് ചെയ്യാനും അണിയറപ്രവര്‍ത്തകര്‍ പദ്ധതിയിടുന്നുണ്ട്. ഇപ്പോള്‍ ചിത്രത്തിന്റെ സ്‌ക്രിപ്റ്റിംഗ് ജോലികള്‍ നടന്നുകൊണ്ടിരിക്കുകയാണ്.
2025 പകുതിയോടെ ഗജിനി 2വിനെ കുറിച്ച് കൂടുതല്‍ വ്യക്തമായ ചിത്രം ലഭിക്കുമെന്നും റിപ്പോര്‍ട്ടില്‍ പറയുന്നു. ആരാണ് ഇരു ഭാഷയിലും ചിത്രം സംവിധാനം ചെയ്യുന്നതെന്ന കാര്യത്തില്‍ തീരുമാനമായിട്ടില്ല. ഗജിനിയുടെ രണ്ടാം ഭാഗത്തില്‍ താനും ഭാഗമാണെന്ന് കങ്കുവയുടെ പ്രൊമോഷനോട് അനുബന്ധിച്ച് പിങ്ക്‌വില്ലക്ക് നല്‍കിയ അഭിമുഖത്തില്‍ സൂര്യ പറഞ്ഞിരുന്നു.
