ആയിരം കോടി എന്ന മാന്ത്രിക സംഖ്യയിലേക്ക് ബോക്‌സ് ഓഫീസ് കളക്ഷന്‍ എത്തുന്നതിന് മുമ്പേ പ്രഭാസ്-നാഗ് അശ്വിന്‍ ചിത്രം ‘കല്‍ക്കി 2898 എഡി’ ഒ.ടി.ടി സ്ട്രീമിംഗ് ആരംഭിക്കാന്‍ ഒരുങ്ങുന്നുവെന്ന് റിപ്പോര്‍ട്ടുകള്‍. 815 കോടി രൂപയാണ് കല്‍ക്കി ഇതുവരെ ബോക്‌സ് ഓഫീസില്‍ നിന്നും നേടിയിരിക്കുന്നത്. ചിത്രം ആയിരം കോടി ക്ലബ്ബിലെത്തുമെന്ന പ്രതീക്ഷയിലാണ് ആരാധകര്‍.
ഇതിനിടെയാണ് കല്‍ക്കിയുടെ ഒ.ടി.ടി റിലീസുമായി ബന്ധപ്പെട്ട വാര്‍ത്തകള്‍ എത്തിയിരിക്കുന്നത്. ചിത്രം ഉടന്‍ ഒടിടിയില്‍ ലഭ്യമാകുമെന്നും രണ്ട് പ്ലാറ്റ്‌ഫോമുകളിലായിരിക്കും ചിത്രത്തിന്റെ സ്ട്രീമിംഗ് എന്നുമാണ് റിപ്പോര്‍ട്ടുകള്‍. ഒ.ടി.ടി റിലീസായി ആമസോണ്‍ പ്രൈമിലും നെറ്റ്ഫ്‌ലികിസിലും ചിത്രം എത്തും. ഇംഗ്ലീഷ് സബ്‌ടൈറ്റിലുകളോടെയായിരിക്കും ചിത്രം ഒ.ടി.ടിയിലെത്തുക.
പ്രഭാസിനെ കൂടാതെ അമിതാഭ് ബച്ചന്‍, ദീപിക പദുക്കോണ്‍, കമല്‍ ഹാസന്‍, ശോഭന തുടങ്ങി വന്‍ താരനിരയാണ് ചിത്രത്തിലുള്ളത്. കൂടാതെ വിജയ് ദേവരകൊണ്ട, ദുല്‍ഖര്‍ സല്‍മാന്‍, രാജമൗലി, രാം ഗോപാല്‍ വര്‍മ്മ എന്നിവര്‍ കാമിയോ റോളുകളിലും എത്തിയിരുന്നു. തെലുങ്ക്, തമിഴ്, മലയാളം, ഹിന്ദി, കന്നഡ ഭാഷകളിലായാണ് ചിത്രം തിയേറ്ററിലെത്തിയത്.
തെലുങ്ക്, മലയാളം, തമിഴ്, കന്നഡ പതിപ്പുകള്‍ ആമസോണ്‍ പ്രൈമില്‍ ലഭ്യമാകും. അതേസമയം ചിത്രത്തിന്റെ ഹിന്ദി പതിപ്പ് ഇംഗ്ലീഷ് സബ്‌ടൈറ്റിലുകളോട് നെറ്റ്ഫ്‌ലിക്‌സില്‍ മാത്രമായിരിക്കും സംപ്രേഷണം ചെയ്യുക. ജൂണ്‍ 27ന് തിയേറ്ററുകളിലെത്തിയ ചിത്രം ജൂലൈയില്‍ തന്നെ ഒ.ടി.ടിയില്‍ എത്തിക്കാന്‍ ആയിരുന്നു ആദ്യം തീരുമാനിച്ചിരുന്നത്.
എന്നാല്‍ ചിത്രം കാണാന്‍ തിയേറ്ററുകളിലേക്ക് ഇപ്പോഴും പ്രേക്ഷകര്‍ എത്തുന്നതിനാലാണ് ഒ.ടി.ടി റിലീസ് മാറ്റിവച്ചത്. സെപ്റ്റംബര്‍ രണ്ടാം വാരത്തോട് കൂടി ചിത്രം ഒ.ടി.ടിയില്‍ എത്തുമെന്നാണ് റിപ്പോര്‍ട്ടുകള്‍. 600 കോടി മുതല്‍ മുടക്കില്‍ നിര്‍മിച്ച ചിത്രം ഇന്ത്യയിലെ ഏറ്റവും ചെലവേറിയ ചിത്രങ്ങളില്‍ ഒന്നാണ്. ഓപ്പണിംഗ് ദിനത്തില്‍ തന്നെ ചിത്രം 191 കോടി രൂപയാണ് ബോക്‌സ് ഓഫീസില്‍ നിന്നും നേടിയത്.
