‘ചലഞ്ചിംഗ് സ്റ്റാർ’ എന്നറിയപ്പെടുന്ന കന്നഡ സൂപ്പർ താരം ദർശൻ കൊലപാതകക്കേസിൽ മൈസൂരിൽ അറസ്റ്റിലായി. ചിത്രദുർഗയിൽ നിന്നുള്ള രേണുക സ്വാമി എന്നയാളുടെ കൊലപാതകത്തിൽ പങ്കുണ്ടെന്ന് ആരോപിച്ചാണ് ദർശനെ കസ്റ്റഡിയിലെടുത്തത്.
ദർശന്റെ അടുത്ത സുഹൃത്തും നടിയുമായ പവിത്ര ഗൗഡയ്ക്ക് രേണുക സ്വാമി അശ്ലീല സന്ദേശങ്ങൾ അയയ്ക്കുകയും സമൂഹമാധ്യമങ്ങളിൽ കമന്റുകളിടുകയും ചെയ്‌തതിലുള്ള വിരോധമാണ് കൊലപാതകത്തിലേക്ക് നയിച്ചത് എന്നാണ് റിപോർട്ടുകൾ.
ചോദ്യം ചെയ്യലിൽ നടൻ ദർശൻ്റെ നിർദ്ദേശപ്രകാരമാണ് രേണുക സ്വാമി യെ കൊലപ്പെടുത്തിയതെന്ന് വ്യക്തമായി. ദർശൻ്റെ കൺമുന്നിൽ വെച്ച് കൊലപ്പെടുത്തുകയും ദർശൻ്റെ വസതിയിലെ ഗാരേജിൽ വെച്ച് ആയുധങ്ങൾ കൊണ്ട് മർദ്ദിക്കുകയും ചെയ്തതായും റിപോർട്ടുകൾ പറയുന്നു. നടനോടൊപ്പം 10 പേർ കൂടി അറസ്റ്റിലായിട്ടുണ്ട്.
ചിത്രദുർഗ സ്വദേശിയായ എസ് രേണുകസ്വാമി (33) ആണ് കൊല്ലപ്പെട്ടത്. കാമാക്ഷിപാല്യയിലെ അഴുക്കുചാലിൽ നിന്നാണ് ഇയാളുടെ മൃതദേഹം കണ്ടെടുത്തത്. ദർശൻ നിലവിൽ പോലീസ് കസ്റ്റഡിയിലാണ്.
