പ്രഖ്യാപിച്ചത് മുതല് വന് ഹൈപ്പില് നില്ക്കുന്ന ചിത്രമാണ് ‘എമ്പുരാന്’. പൃഥ്വിരാജിന്റെ ആദ്യ സംവിധാന സംരംഭമായ ‘ലൂസിഫര്’ ചിത്രത്തിന്റെ വിജയാഘോഷത്തിനിടെയായിരുന്നു എമ്പുരാന് പ്രഖ്യാപിച്ചത്. ചിത്രത്തിന്റെ ഷൂട്ടിംഗ് ഇപ്പോള് നടന്നു കൊണ്ടിരിക്കുകയാണ്. എമ്പുരാന്റെ വലിയൊരു അപ്ഡേറ്റ് പുറത്തുവിട്ടിരിക്കുകയാണ് പൃഥ്വിരാജ് ഇപ്പോള്.
എമ്പുരാന്റെ ഇനിയുള്ള ചിത്രീകരണം കേരളത്തിലായിരിക്കും എന്നതാണ് ഇപ്പോള് പുറത്തു വന്നിരിക്കുന്ന വിവരം. തന്റെ സോഷ്യല് മീഡിയ പേജുകളിലൂടെയ പൃഥ്വിരാജ് തന്നെയാണ് ഇക്കാര്യം ആരാധകരുമായി പങ്കുവച്ചിരിക്കുന്നത്. എല്ടുഇ, എമ്പുരാന് എന്നീ ഹാഷ് ടാഗുകള്ക്കൊപ്പം ലൊക്കേഷനില് നിന്നുള്ള തന്റെ ചിത്രവും പൃഥ്വിരാജ് പങ്കുവച്ചിട്ടുണ്ട്.
On to home turf next! #L2E #EMPURAAN pic.twitter.com/hScQIKLjFz
— Prithviraj Sukumaran (@PrithviOfficial) April 17, 2024
അതേസമയം, സ്റ്റീഫന് നെടുമ്പളളി എന്ന രാഷ്ട്രീയക്കാരന് എങ്ങനെ അബ്രാം ഖുറേഷിയായി മാറിയത് എന്നതാകും ഈ എമ്പുരാന് പറയാന് പോകുന്നത് എന്നാണ് സൂചന. ടൊവിനോ അവതരിപ്പിച്ച ജതിന് രാംദാസ് എന്ന കഥാപാത്രത്തിന്റെ ഭൂതകാലവും ഈ ചിത്രത്തിലുണ്ടാകും.
ഇലുമാനിറ്റി അടക്കമുള്ള നിഗൂഢതകളുടെ ചുരുള് അഴിയുന്നതും ഈ ഭാഗത്തിലാകും എന്നും സൂചനകളുണ്ട്. ചിത്രത്തിന് ഇനിയൊരു തുടര്ഭാഗം കൂടി ഉണ്ടായേക്കും. ആശിര്വാദ് സിനിമാസും ലൈക പ്രൊഡക്ഷന്സുമാണ് നിര്മ്മാണം. ഉത്തരേന്ത്യയും തമിഴ്നാടും വിദേശരാജ്യങ്ങളുമാണ് മറ്റ് പ്രധാന ലൊക്കേഷനുകളായത്.
മുരളി ഗോപിയാണ് കഥയും തിരക്കഥയും. തിയേറ്ററിലും ഒ.ടി.ടിയിലും വന് ബിസിനസ് ലഭിച്ച ലൂസിഫറിന്റെ രണ്ടാം ഭാഗമായതിനാല് പാന് വേള്ഡ് ലെവലിലാണ് പൃഥ്വിരാജ് എമ്പുരാന് ഒരുക്കുന്നത്. ചിത്രത്തിന്റെ ബജറ്റോ റിലീസ് തീയതിയോ ഇതുവരെ പുറത്തുവിട്ടിട്ടില്ല. ലൂസിഫറിലെ താരങ്ങള്ക്കൊപ്പം കൂടുതല് അഭിനേതാക്കള് ചിത്രത്തിലുണ്ടാകാനാണ് സാധ്യത.