‘ദളപതി 68’ന്റെ ടൈറ്റില്‍ ചോര്‍ന്നുവെന്ന വാര്‍ത്ത കഴിഞ്ഞ ദിവസം പുറത്തെത്തിയിരുന്നു. വിജയ്ക്ക് മുന്നില്‍ സംവിധായകന്‍ വെങ്കട് പ്രഭു 4 പേരുകള്‍ വച്ചതായും അതില്‍ ബോസ് എന്ന പേര് താരം തിരഞ്ഞെടുത്തതായുമാണ് റിപ്പോര്‍ട്ടുകള്‍ എത്തിയത്. എന്നാല്‍ ഇതില്‍ ഔദ്യോഗിക സ്ഥിരീകരണമില്ലായിരുന്നു.
ഈ റിപ്പോര്‍ട്ടുകളോട് പ്രതികരിച്ചിരിക്കുകയാണ് ചിത്രത്തിന്റെ നിര്‍മ്മാതാവ് അര്‍ച്ചന കലപതി. ആരാധകര്‍ ഉദ്ദേശിക്കുന്നതും ചര്‍ച്ചയാകുന്നതും ഒന്നുമല്ല സിനിമയുടെ പേര് എന്ന് അര്‍ച്ചന എക്‌സില്‍ പോസ്റ്റ് ചെയ്ത കുറിപ്പിലൂടെ വ്യക്തമാക്കി.
”എല്ലാ അപ്‌ഡേറ്റുകളും കാണാനിടയായി. ഈ സ്‌നേഹത്തിന് ഒരുപാട് നന്ദി. ശാന്തമായിരിക്കൂ. യഥാര്‍ത്ഥമായതിനായി കാത്തിരിക്കുക. കുറച്ച് സ്‌പെഷ്യലായുള്ള ഒന്നാണ് സംവിധായകന്‍ വെങ്കട്ട് പ്രഭു തയ്യാറാക്കിക്കൊണ്ടിരിക്കുന്നത്. അതൊരിക്കലും ബോസ്, പസില്‍ എന്നിവയല്ല” എന്നാണ് അര്‍ച്ചന എക്‌സില്‍ കുറിച്ചിരിക്കുന്നത്.
ഈ പോസ്റ്റ് സോഷ്യല്‍ മീഡിയയില്‍ വൈറലായിട്ടുണ്ട്. ഇതോടെ ദളപതി 68ന്റെ എന്തെങ്കിലും അപ്‌ഡേറ്റ് നല്‍കാനും ആരാധകര്‍ നിര്‍മ്മാതാവിനോട് ആവശ്യപ്പെടുന്നുണ്ട്. അതേസമയം, എ.ജി.എസ് എന്റര്‍ടെയിന്‍മെന്റ് നിര്‍മ്മിക്കുന്ന 25-ാം ചിത്രമാണിത്.
Read more
പ്രശാന്ത്, പ്രഭുദേവ, ജയറാം, അജ്മല്‍ അമീര്‍, മോഹന്‍, യോഗി ബാബു, വി.ടി.വി ഗണേഷ്, മീനാക്ഷി ചൗധരി, സ്നേഹ, ലൈല എന്നിവരാണ് ചിത്രത്തിലെ മുഖ്യവേഷങ്ങളിലെത്തുന്നത്. ഒപ്പം വെങ്കട് പ്രഭു ചിത്രങ്ങളിലെ സ്ഥിരം സാന്നിധ്യമായ വൈഭവ്, പ്രേംജി അമരന്‍, അരവിന്ദ്, അജയ് രാജ് എന്നിവരും താരനിരയിലുണ്ട്.
