ചുരുങ്ങിയ ചിത്രങ്ങളിലൂടെ പ്രേക്ഷകർക്കിടയിൽ ശ്രദ്ധ നേടിയ യുവ നടനാണ് അനു മോഹൻ. ചട്ടമ്പിനാട് എന്ന ചിത്രത്തിലൂടെ ബാലതാരമായാണ് അനു മോഹൻ കരിയർ തുടങ്ങുന്നത്. സഹതാരമായും പ്രതിനായകനായും നിരവധി മലയാള ചിത്രങ്ങളിൽ അനു മോഹൻ ഇതിനോടകം അഭിനയിച്ചിട്ടുണ്ട്. നടനും, നിർമ്മാതാവും, സംവിധായകനായുമെല്ലാമായ പൃഥ്വിരാജ് സുകുമാരന്റെ പക്കൽ നിന്നും ലഭിച്ച ചില ഓർമകൾ പങ്കുവച്ചിരിക്കുകയാണ് താരമിപ്പോൾ.
പൃഥ്വിരാജിനൊപ്പം സിനിമയിൽ പ്രവർത്തിക്കുമ്പോൾ ഒട്ടേറെ പുതിയ കാര്യങ്ങൾ പഠിക്കാനാകുമെന്നാണ് അനു മോഹൻ പറയുന്നത്. 7th ഡേ സിനിമയുടെ ചിത്രീകരണ സമയത്ത് പൃഥ്വിരാജ് മേക്കപ്പ് ചെയ്ത് നല്‍കിയ അനുഭവവും നടൻ പങ്കുവെച്ചു. സൈന സൗത്തിന് നൽകിയ അഭിമുഖത്തിലാണ് നടന്റെ പ്രതികരണം. 7th ഡേ ചിത്രത്തിന്റെ ചിത്രീകണം നടക്കുമ്പോഴാണ് പൃഥ്വിരാജിനെ പരിചയപ്പെടുന്നതെന്നും അന്ന് മുതൽ ഞെട്ടിച്ചു കൊണ്ടിരിക്കുന്ന മനുഷ്യനാണ് പൃഥ്വിരാജ് എന്നും അനു മോഹൻ പറയുന്നു.
തന്റെയും ടൊവിനോ തോമസിന്റയും മൂന്നാമത്തേയോ നാലാമത്തെയോ ചിത്രമായിരുന്നു ഇത്. തിരക്കഥ ഡിസ്‌കസ് ചെയ്യുന്ന സമയം എല്ലാരോടും സംശയം തീർത്ത് നേതൃത്വം നൽകുന്ന ഒരാളായാണ് പൃഥ്വിരാജിനെ അവിടെ കണ്ടത്. സിനിമയുടെ ഏത് മേഖലയെക്കുറിച്ച് ചോദിച്ചാലും അദ്ദേഹത്തിന് അറിയാം. മേക്കപ്പ് പോലും അറിയാം. എന്നെ ഒരിക്കൽ രാജുവേട്ടൻ മേക്കപ്പ് ചെയ്തു തന്നിട്ടുണ്ട്.
രാവിലെ ഷൂട്ടിന് മേക്കപ്പ് ചെയ്ത് വന്ന എന്നെ വിളിച്ച് ‘മുഖത്തെ ഈ മാർക്ക് കഴിഞ്ഞ രംഗത്തിൽ ഇവിടായിരുന്നോ എന്ന് ചോദിച്ചു’ അതിന് ശേഷം പുള്ളി തന്നെ എനിക്ക് മേക്കപ്പ് ചെയ്ത് തന്നു. ഇതിന് ശേഷം എത്രയോ കഴിഞ്ഞാണ് മുന്‍പത്തെ സീനുകൾ എടുക്കുന്നത്. പക്ഷെ ആ രംഗത്തിന് ഈ മേക്കപ്പ് കൃത്യമായിരുന്നു,’ അനു മോഹൻ പറഞ്ഞു. ഓരോ സിനിമയിലും ഓരോ ദിവസവും അദ്ദേഹത്തിൽ നിന്ന് പഠിക്കാനുണ്ടെന്നും അത്രയും അപ്ഡേറ്റ് ആണ് പൃഥ്വിരാജെന്നും അനു മോഹൻ കൂട്ടിച്ചേർത്തു.
