ഹേമ കമ്മിറ്റി റിപ്പോര്‍ട്ട് ദുരൂഹമാണെന്നും സിനിമയെ ഒന്നടങ്കം മോശമാക്കരുതെന്നും ഫിലിം ചേംബര്‍ ജനറല്‍ സെക്രട്ടറി സജി നന്ത്യാട്ട്. ഏകപക്ഷീയമായ റിപ്പോര്‍ട്ടാണിത്. സിനിമയില്‍ സജീവമല്ലാത്തവരെ പറഞ്ഞു പഠിപ്പിച്ച് പറയിപ്പിച്ചതാണെന്നുമാണ് സജി നന്ത്യാട്ട് പറയുന്നത്.
എല്ലാ മേഖലയിലും ഉള്ള പ്രശ്‌നങ്ങള്‍ തന്നെയാണ് സിനിമ മേഖലയിലും ഉള്ളത്. ഡബ്ല്യുസിസിയിലെ പ്രധാന നടി തന്നെ പ്രശ്‌നങ്ങള്‍ ഇല്ലെന്ന് പറഞ്ഞു. പതിനായിരക്കണക്കിന് പേര് പ്രവര്‍ത്തിക്കുന്ന മേഖലയാണിത്. എല്ലാവരുടെയും സ്വഭാവ സര്‍ട്ടിഫിക്കറ്റ് ഹാജരാക്കാന്‍ പറയാന്‍ പറ്റില്ല. ഐസിസിയില്‍ പരാതികള്‍ വന്നിട്ടില്ല.
ഹേമ കമ്മിറ്റി ചര്‍ച്ച ജനറല്‍ബോഡി ചര്‍ച്ച ചെയ്യും എന്നാണ് സജി നന്ത്യാട്ട് പറയുന്നത്. സംഭവം ചര്‍ച്ചയായതോടെ ഫിലിം ചേംബര്‍ എക്സിക്യൂട്ടീവ് അംഗങ്ങള്‍ പ്രതികരണവുമായി രംഗത്തെത്തി. സജി നന്ത്യാട്ടിന്റെ പ്രസ്താവന ഫിലിം ചേംബറിന്റേതല്ല. അദ്ദേഹത്തിന്റെ മാത്രം അഭിപ്രായമാണ്. ഹേമ കമ്മിറ്റി റിപ്പോര്‍ട്ടില്‍ ചര്‍ച്ച വേണം.
ഇന്നത്തെ എക്സിക്യൂട്ടീവ് കമ്മിറ്റി യോഗത്തില്‍ ചര്‍ച്ച ചെയ്യുമെന്ന് എക്സിക്യൂട്ടീവ് കമ്മിറ്റി അംഗങ്ങള്‍ വ്യക്തമാക്കി. അതേസമയം, ഹേമ കമ്മിറ്റി റിപ്പോര്‍ട്ട് പ്രകാരം പരാതി കിട്ടിയാല്‍ അന്വേഷിക്കുമെന്ന് മുഖ്യമന്ത്രി വ്യക്തമാക്കിയിട്ടുണ്ടെന്ന് ഫിലിം ചേംബര്‍ പ്രസിഡന്റ് ബി ആര്‍ ജേക്കബും പ്രതികരിച്ചു. പരാതികള്‍ ഞങ്ങള്‍ക്ക് കിട്ടിയിട്ടില്ല. റിപ്പോര്‍ട്ട് വായിച്ചിട്ടില്ല. അതുകൊണ്ട് ഒന്നും അറിഞ്ഞിട്ടില്ലെന്നും ബിആര്‍ ജേക്കബ് പറഞ്ഞു.
