സുരേഷ് ഗോപിയെ നായകനാക്കി ഒരുക്കുന്ന ‘ഒരു പെരുങ്കളിയാട്ടം’ ചിത്രം അന്തരിച്ച വിഖ്യാത ചലച്ചിത്രകാരന്‍ അക്കിര കുറോസോവയ്ക്കുള്ള ആദരമാണെന്ന് സംവിധായകന്‍ ജയരാജ്. ഒരു യൂട്യൂബ് ചാനലിന് നല്‍കിയ അഭിമുഖത്തിലാണ് ജയരാജ് ഇക്കാര്യം വ്യക്തമാക്കിയത്.
കളിയാട്ടത്തില്‍ നിന്ന് പ്രചോദനം ഉള്‍ക്കൊണ്ട ഈ ചിത്രം അക്കിര കുറോസോവയ്ക്കും അദ്ദേഹത്തിന്റെ മാസ്റ്റര്‍പീസ് ചിത്രമായ ‘സെവന്‍ സമുറായ്’ക്കുമുള്ള ആദരാവായിട്ടാണ് പെരുങ്കളിയാട്ടം ഒരുക്കിയിരിക്കുന്നത് എന്ന് ജയരാജ് വ്യക്തമാക്കി.
ഷൈന്‍ ടോം ചാക്കോ, അനശ്വര രാജന്‍, ബി.എസ് അവിനാഷ് എന്നിവരാണ് ‘ഒരു പെരുങ്കളിയാട്ടം’ എന്ന ചിത്രത്തിലെ മറ്റുപ്രധാന കഥാപാത്രങ്ങളെ അവതരിപ്പിക്കുന്നത്. 1954ല്‍ ഇറങ്ങിയ ജാപ്പാനീസ് സമുറായ് ചിത്രമാണ് സെവന്‍ സമുറായ്. കൊള്ളക്കാരില്‍ നിന്ന് തങ്ങളുടെ വിളകള്‍ സംരക്ഷിക്കാന്‍ റോണിനെ തേടുന്ന ഗ്രാമീണരുടെ കഥയായിരുന്നു സെവന്‍ സമുറായ്.
വില്യം ഷേക്സ്പിയറിന്റെ ‘ഒഥല്ലോ’ എന്ന നാടകത്തില്‍ നിന്ന് പ്രചോദനം ഉള്‍കൊണ്ടായിരുന്നു മുമ്പ് ജയരാജ് സുരേഷ് ഗോപി നായകനായ ‘കളിയാട്ടം’ ഒരുക്കിയത്. മഞ്ജു വാര്യര്‍, ബിജു മേനോന്‍ എന്നിവരായിരുന്നു ചിത്രത്തിലെ പ്രധാനതാരങ്ങള്‍.
Read more
ചിത്രത്തിലെ അഭിനയത്തിന് സുരേഷ് ഗോപിക്ക് മികച്ച നടനുള്ള ദേശീയ പുരസ്‌കാരം ലഭിച്ചിരുന്നു. അതേസമയം, ഈ വര്‍ഷം മാര്‍ച്ച് അവസാനത്തോടെ ആയിരുന്നു പെരുങ്കളിയാട്ടത്തിന്റെ ലൊക്കേഷന്‍ ചിത്രങ്ങള്‍ പങ്കുവച്ച് സുരേഷ് ഗോപി സിനിമ വരുന്ന വിവരം അറിയിച്ചത്.
