ബോളിവുഡിനെ പിടിച്ചുലയ്ക്കാൻ എത്തിയിരിക്കുകയാണ് ഷാരൂഖ് ഖാൻ ചിത്രം ‘ജവാൻ’. 300 കോടി ബജറ്റിൽ തമിഴ് സംവിധായകൻ അറ്റ്ലി ഒരുക്കിയ ചിത്രത്തിൽ നായികയായി എത്തിയത് ലേഡി സൂപ്പർസ്റ്റാർ നയൻതാരയാണ്. വിജയ് സേതുപതി, പ്രിയാമണി, ദീപിക പദുകോൺ തുടങ്ങിയ വലിയ താരനിരയും ചിത്രത്തിലുണ്ട്.

അഭിനേതാക്കൾക്ക് നൽകിയ പ്രതിഫലം കൊണ്ടുതന്നെ ‘ജവാൻ’ ഈ വർഷത്തെ ഏറ്റവും ചെലവേറിയ സിനിമകളിൽ ഒന്നുകൂടിയാണ് എന്നാണ് റിപ്പോർട്ടുകൾ പറയുന്നത്. ജവാനിൽ അഭിനയിക്കാൻ ഷാരൂഖ് ഖാൻ നൂറ് കോടി രൂപ പ്രതിഫലം വാങ്ങി എന്നാണ് റിപ്പോർട്ട്. ഇത് കൂടാതെ കളക്ഷന്റെ 60 ശതമാനവും ഷാരുഖിന് ലഭിക്കും.

വിജയ് സേതുപതിയുടെ ആദ്യ ബോളിവുഡ് ചിത്രമായ ജവാനിൽ 21 കോടി രൂപയാണ് പ്രതിഫലം. നയൻതാരയുടെയും ആദ്യ ബോളിവുഡ് ചിത്രമാണിത്.  ചിത്രത്തിൽ നയൻതാരയ്ക്ക് 10 കോടി രൂപയാണ് പ്രതിഫലം എന്നാണ് റിപ്പോർട്ടുകൾ. ചെന്നൈ എക്സ്പ്രസ് എന്ന ചിത്രത്തിന് ശേഷം ഷാരുഖ് ഖാനും പ്രിയാമണിയും ഒന്നിക്കുന്ന ചിത്രമാണ് ജവാൻ. സിനിമയിൽ പ്രിയാമണി വാങ്ങിയ പ്രതിഫലം 2 കോടി രൂപയാണ്. എന്നാൽ ദീപികയുടെ പ്രതിഫലം എത്രയാണെന്ന് ഇതുവരെ വ്യക്തമല്ല. 15 മുതൽ 30 കോടി രൂപ വരെയാണ് താരം പൊതുവെ പ്രതിഫലമായി വാങ്ങാറുള്ളത്.

സന്യ മൽഹോത്രയും ഷാരൂഖിനൊപ്പം ആദ്യമായാണ് അഭിനയിക്കുന്നത്. മൂന്ന് കോടി രൂപയാണ് ചിത്രത്തിലെ അഭിനയത്തിന് താരത്തിന് ലഭിക്കുന്നത്. സുനിൽ ഗ്രോവർ 75 ലക്ഷം രൂപയും യോഗി ബാബുവിന് 35 ലക്ഷം രൂപയുമാണ് പ്രതിഫലം എന്നാണ് റിപ്പോർട്ട്. ലേഡി സൂപ്പർ സ്റ്റാർ നയൻതാരയാണ് ചിത്രത്തിലെ നായിക .റെഡ് ചില്ലീസ് എന്റർടെയ്ൻമെന്റിന് വേണ്ടി ഗൗരി ഖാനാണ് ജവാൻ നിർമ്മിച്ചിരിക്കുന്നത്.

തെരി, മെർസൽ, ബിഗിൽ തുടങ്ങിയ സൂപ്പർഹിറ്റ് തമിഴ് സിനിമകൾ ഒരുക്കിയ അറ്റ്‌ലിയുടെ ആദ്യ ബോളിവുഡ് ചിത്രമാണ് ജവാൻ. അനിരുദ്ധ് രവിചന്ദറാണ് ചിത്രത്തിനു സംഗീതം ഒരുക്കുന്നത്. തമിഴ്, തെലുങ്ക്, ഹിന്ദി എന്നീ ഭാഷകളിലാണ് ചിത്രം റിലീസ് ചെയ്തത്.