പുതുവര്‍ഷമായ 2023ല്‍ നിര്‍ബന്ധമായും കണ്ടിരിക്കേണ്ട 52 ടൂറിസം കേന്ദ്രങ്ങളില്‍ ഒന്നായി കേരളവും. ന്യൂയോര്‍ക്ക് ടൈംസ് തയാറാക്കിയ പട്ടികയില്‍ പതിമൂന്നാമതായാണ് കേരളത്തെ ഉള്‍പ്പെടുത്തിയിരിക്കുന്നത്. അതിമനോഹരമായ കടല്‍ത്തീരങ്ങളാലും കായലുകളാലും രുചികരമായ ഭക്ഷണങ്ങളാലും സാംസ്‌കാരിക തനിമയാലും പ്രശസ്തമാണ് കേരളമെന്നും ന്യൂയോര്‍ക്ക് ടൈംസ് വ്യക്തമാക്കുന്നു.
വൈക്കത്തഷ്ടമി ഉത്സവത്തെ കുറിച്ചും കുമരകത്തെ സര്‍ക്കാരിന്റെ ഉത്തരവാദിത്ത ടൂറിസം പദ്ധതിയേയും മറവന്‍തുരുത്തിനെക്കുറിച്ചും ന്യൂയോര്‍ക്ക് ടൈംസ് ഫീച്ചറില്‍ പ്രത്യേകം പരാമര്‍ശിച്ചിട്ടുണ്ട്.
Read more
ഇന്ത്യയില്‍ നിന്നും പട്ടികയില്‍ ഉള്‍പ്പെട്ട ഏക സംസ്ഥാനം കേരളമാണ്. ലണ്ടന്‍, ജപ്പാനിലെ മോറിയോക്ക, സ്‌കോട്ട്ലന്‍ഡിലെ കില്‍മാര്‍ട്ടിന്‍ ഗ്ലെന്‍, ന്യൂസിലന്‍ഡിലെ ഓക്ലന്‍ഡ്, കാലിഫോര്‍ണിയയിലെ പാം സ്പ്രിങ്സ്, ഓസ്ട്രേലിയയിലെ കംഗാരു ഐലന്‍ഡ്, നോര്‍വേയിലെ ട്രോംസോ എന്നിവയ്ക്കൊപ്പമാണ് കേരളവും ഇടം പിടിച്ചിരിക്കുന്നത്. കേരള സര്‍ക്കാരിന്റെ ജനകീയ ടൂറിസം നയത്തിന് ജനങ്ങള്‍ നല്‍കി വരുന്ന പിന്തുണ തുടര്‍ന്നും പ്രതീക്ഷിക്കുന്നതായി മന്ത്രി മുഹമ്മദ് റിയാസ് പറഞ്ഞു.
