വിരമിച്ച സൈനികനെ മദ്യം നൽകി ബോധം കെടുത്തി മാല പൊട്ടിച്ച യുവാവിനെ പൊലീസ് അറസ്റ്റ് ചെയ്തു. തച്ചോണം മുല്ലക്കര സ്വദേശി അനീഷിനെ(35) യാണ് പാങ്ങോട് പൊലീസ് അറസ്റ്റ് ചെയ്തത്. ബാറിൽ വച്ച് കണ്ട സൗഹൃദത്തിലാണ് ഇയാൾ വിരമിച്ച സൈനികനോടൊപ്പം കൂടി മദ്യം നൽകിയത്. ഓട്ടോ ഡ്രൈവറാണ് പ്രതി.
അബോധാവസ്ഥയിലായ സൈനികന്റെ കഴുത്തിൽ നിന്ന് ഒന്നരപ്പവന്‌‍റെ മാലയാണ് അനീഷ് പൊട്ടിച്ചെടുത്തത്. സ്വർണമാല യുവാവ് വിറ്റിരുന്നു. ഈ മാസം ആറാം തീയതിയായിരുന്നു സംഭവം.മുൻ സൈനികൻ നഗരത്തിലെ ഒരു ബാറിൽ മദ്യപിച്ചിരിക്കുമ്പോൾ പ്രതിയായ അനീഷ് അടുത്ത് ചെന്ന് സൗഹൃദം സ്ഥാപിക്കുകയായിരുന്നു.
പിന്നീട് അന്ന് തന്നെ നഗരത്തിലെ പലസ്ഥലങ്ങളിൽ ഇവർ അനീഷിന്റെ ഓട്ടോയിൽ കറങ്ങി മദ്യപിച്ചു. ഒടുവിൽ സൈനികന്റെ ബോധം നഷ്ടപ്പെട്ടതോടെ ഓട്ടോ റിക്ഷയിൽ വച്ച് മാല പൊട്ടിച്ചെടുക്കുകയായിരുന്നു. മാലയുടെ ഒരു ഭാഗം ഓട്ടോയിൽ തന്നെ ഉപേക്ഷിച്ചു. ബാക്കി അനീഷ് എടുത്ത് കല്ലറയിലെ ജുവല്ലറിയിൽ കൊണ്ടു പോയി വിൽക്കുകയായിരുന്നു.
Read more
മാല മോഷണം പോയത് അല്ല പൊട്ടിപ്പോയതാണെന്ന് കാണിക്കുവാനാണ് ഒരു ഭാഗം ഓട്ടോറിക്ഷയിൽ ഉപേക്ഷിച്ചതെന്ന് അനീഷ് പൊലീസിനോട് പറഞ്ഞു. മാല വിറ്റ ജ്വല്ലറിയിൽ ഇയാളെ എത്തിച്ച് പൊലീസ് തെളിവെടുപ്പ് നടത്തി. നെടുമങ്ങാട് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
