എസ്എഫ്‌ഐയ്‌ക്കെതിരെ വിമര്‍ശനം ഉന്നയിച്ച സിപിഐ സംസ്ഥാന സെക്രട്ടറി ബിനോയ് വിശ്വത്തിനെതിരെ ഭീഷണി. സിപിഎം പ്രവര്‍ത്തകനായ രഞ്ജിഷ് ടിപി കല്ലാച്ചിയാണ് ബിനോയ് വിശ്വത്തിനെതിരെ ഭീഷണി ഉയര്‍ത്തിയിരിക്കുന്നത്. ഫേസ്ബുക്കിലൂടെയാണ് സിപിഎം പ്രവര്‍ത്തകന്‍ ബിനോയ് വിശ്വത്തിനെതിരെ ഭീഷണി ഉയര്‍ത്തിയത്.
നാദാപുരത്തെ സിപിഎം പ്രവര്‍ത്തകരുടെ ആത്മസമര്‍പ്പണത്തിന്റെ ഭാഗമായി എംഎല്‍എയും മന്ത്രിയുമായ ബിനോയ് വിശ്വം എസ്എഫ്‌ഐക്ക് ക്ലാസെടുക്കാന്‍ വരരുതെന്നാണ് രഞ്ജിഷിന്റെ ഭീഷണി. നേരത്തെ നാദാപുരം എംഎല്‍എ ആയിരുന്നു ബിനോയ് വിശ്വം. ഇനിയും ബിനോയ് വിശ്വം വിമര്‍ശനം ഉന്നയിച്ചാല്‍ കണക്ക് ചോദിക്കുന്നത് എസ്എഫ്ഐ ആയിരിക്കില്ലെന്നും രഞ്ജിഷ് പോസ്റ്റിലൂടെ പറയുന്നു.
കോഴിക്കോട് കൊയിലാണ്ടി ഗുരുദേവ കോളേജില്‍ എസ്എഫ്ഐ പ്രവര്‍ത്തകര്‍ പ്രിന്‍സിപ്പലിനെ മര്‍ദ്ദിച്ച സംഭവത്തിന് പിന്നാലെയാണ് ബിനോയ് വിശ്വം എസ്എഫ്ഐയെ വിമര്‍ശിച്ച് രംഗത്തെത്തിയത്. എസ്എഫ്ഐ പ്രവര്‍ത്തകര്‍ക്ക് ഇടതുപക്ഷം എന്ന വാക്കിന്റെ അര്‍ത്ഥവും ആദര്‍ശവും അറിയില്ലെന്നായിരുന്നു ബിനോയ് വിശ്വത്തിന്റെ പ്രസ്താവന.
എസ്എഫ്ഐയുടേത് ഇടതുപക്ഷ പ്രസ്ഥാനത്തിന്റെ ശൈലിയല്ല. എസ്എഫ്ഐ ശൈലി തിരുത്തിയേ മതിയാകൂ. സംഘടനയിലുള്ളവര്‍ വിദ്യാര്‍ത്ഥി പ്രസ്ഥാനത്തിന്റെ ചരിത്രം വായിക്കണം. അവരെ ചരിത്രം പഠിപ്പിക്കണമെന്നും ബിനോയ് വിശ്വം പറഞ്ഞിരുന്നു.
പോസ്റ്റിന്റെ പൂര്‍ണ്ണരൂപം;
Read more
നാദാപുരത്തെ സിപിഎം പ്രവര്‍ത്തകരുടെ ആത്മസമര്‍പ്പണത്തിന്റെ ഭാഗമായി എംഎല്‍എയും മന്ത്രിയുമായ നീ എസ്എഫ്‌ഐക്ക് ക്ലാസെടുക്കാന്‍ വരരുത്.. അടിയന്തരാവസ്ഥയുടെ ഇരുണ്ട നാളുകളില്‍ നീ നടത്തിയ ജല്പനങ്ങള്‍ ഇനിയും നീ പുറത്തെടുത്താല്‍ കണക്ക് ചോദിക്കുന്നത് എസ്എഫ്ഐ ആയിരിക്കില്ല ഓര്‍ത്താല്‍ നല്ലത്..
