പാര്‍ലമെന്റില്‍ അവതരിപ്പിക്കാന്‍ കേന്ദ്രസര്‍ക്കാര്‍ തയ്യാറാക്കിയ മുത്തലാഖ് ബില്ലിനെതിരെ മുസ്ലീം ലീഗ് രംഗത്ത്. ബില്ലില്‍ വൈരുദ്ധ്യമുണ്ടെന്ന് ലീഗ് ദേശീയ സെക്രട്ടറി ഇ ടി മുഹമ്മദ് ബഷീര്‍ പറഞ്ഞു. വിഷയം ഇന്ന് ചേരുന്ന ദേശീയ കൗണ്‍സിലില്‍ ചര്‍ച്ച ചെയ്യും.
പാര്‍ലമെന്റില്‍ അവതരിപ്പിക്കാനുള്ള മുത്തലാഖ് ബില്ല് വിഷയമായിരിക്കും ഇന്ന് ഡല്‍ഹിയില്‍ ചേരുന്ന ലീഗ് ദേശീയ കൗണ്‍സിലിന്റെ പ്രധാന അജണ്ട. ബില്ലിനോട് എന്ത് സമീപനം സ്വീകരിക്കണമെന്ന് കൗണ്‍സിലില്‍ തീരുമാനമെടുക്കുമെന്നും ഇ.ടി വ്യക്തമാക്കി. ബില്ല് അപ്രായോഗികമാണെന്ന നിലപാടിലാണ് ലീഗ് സംസ്ഥാനഘടകം കോഴിക്കോട് ചേര്‍ന്ന മുസ്ലീം ലീഗ് സംസ്ഥാനപ്രവര്‍ത്തക സമിതി യോഗത്തിനു ശേഷമായിരുന്നു പ്രതികരണം.
Read more
മുത്തലാഖ് ബില്‍ പിന്‍വലിക്കണമെന്ന് മുസ്‌ലിം വ്യക്തിനിയമ ബോര്‍ഡ് കഴിഞ്ഞദിവസം ആവശ്യപ്പെട്ടിരുന്നു. യാതൊരു കൂടിയാലോചനയും നടത്താതെ ഏകപക്ഷീയമായാണു കേന്ദ്ര സര്‍ക്കാര്‍ ബില്‍ കൊണ്ടുവരുന്നതെന്ന് അഖിലേന്ത്യാ മുസ്‌ലിം വ്യക്തിനിയമ ബോര്‍ഡ് വക്താവ് സജാദ് നൊമാനി ആരോപിച്ചു. മുത്തലാഖ് ക്രിമിനല്‍ കുറ്റമാക്കുന്ന കരട് ബില്ലിന് കേന്ദ്രമന്ത്രിസഭ അംഗീകാരം നല്‍കിയിരുന്നു. മുത്തലാഖ് ജാമ്യമില്ലാക്കുറ്റമാക്കാനും മുത്തലാഖിലൂടെ വിവാഹമോചനം ചെയ്താല്‍ പുരുഷന് മൂന്നുവര്‍ഷം വരെ തടവ് ശിക്ഷ നല്‍കാനും വ്യവസ്ഥ ചെയ്യുന്ന ബില്ലിനാണ് കേന്ദ്രം രൂപം നല്‍കിയത്.
