തനിക്കും കുടുംബത്തിനുമെതിരെ നടക്കുന്ന വ്യക്തിഹത്യക്കെതിരെ ആഞ്ഞടിച്ച് കെഎസ്ആര്‍ടിസി സിഎംഡിയും ഗതാഗത സെക്രട്ടറിയുമായ ബിജു പ്രഭാകര്‍. 22 വര്‍ഷം മുന്‍പു മരണപ്പെട്ടുപോയ എന്റെ പിതാവിനെ വരെ അധിക്ഷേപിച്ചു കെഎസ്ആര്‍ടിസി ബസുകളില്‍ പോസ്റ്റര്‍ പതിക്കുകയും സമൂഹമാധ്യമങ്ങളില്‍ കുപ്രചാരണം നടത്തുകയും ചെയ്യുന്നുവെന്ന് അദേഹം ഫേസ്ബുക്കില്‍ കുറിച്ചു.
കഴിഞ്ഞദിവസം കോട്ടയത്തു ക്ലസ്റ്റര്‍ ഓഫിസറുടെ മരണത്തെ തുടര്‍ന്നു ചേര്‍ന്ന അനുശോചന സമ്മേളനത്തില്‍ സിഎംഡിയ്‌ക്കെതിരെ ഒരു കണ്ടക്ടര്‍ വ്യക്തിപരമായ ആക്ഷേപിച്ചു പ്രസംഗിച്ചിരുന്നു.
ഈ ജീവനക്കാരനെ പിന്നീടു സസ്‌പെന്‍ഡ് ചെയ്തു. വ്യക്തിപരമായി ആക്ഷേപം ചൊരിയുന്നവരുടെ നിലവാരത്തിലേക്കു താഴാന്‍ തന്റെ സംസ്‌കാരം അനുവദിക്കുന്നില്ലെന്നു അദേഹം വ്യക്തമാക്കി. എന്നാല്‍ ജീവനക്കാരെയും മാനേജ്‌മെന്റിനെയും തമ്മില്‍ തെറ്റിക്കാന്‍ തെറ്റായ കാര്യങ്ങള്‍ നിരന്തരം പ്രചരിപ്പിക്കുന്നവര്‍ക്കെതിരെ നടപടിയുണ്ടാകും. കെഎസ്ആര്‍ടിസിയില്‍ വര്‍ഷങ്ങളായി നിലനില്‍ക്കുന്ന പ്രതിസന്ധിയുടെ മൊത്തം കാരണക്കാരന്‍ രണ്ടരവര്‍ഷം മുന്‍പു മാത്രം ചാര്‍ജ് എടുത്ത സിഎംഡി ആണെന്നുമുള്ള പ്രചാരണമാണു നടക്കുന്നതെന്നും ബിജു പ്രഭാകര്‍ ആരോപിച്ചു.
Read more
വെല്ലുവിളികള്‍ ഏറെ ഉണ്ടായിരുന്നുവെങ്കിലും കൃത്യമായി പഠിച്ചു വ്യക്തമായ കാഴ്ചപ്പാടോടുകൂടി സര്‍ക്കാരിന്റെയും മുഖ്യമന്ത്രിയുടെയും ഗതാഗത മന്ത്രിയുടെയും പിന്തുണയോടെ മുന്നോട്ടു പോവുകയാണ്. തൊഴിലാളികള്‍ക്ക് ആദ്യ പരിഗണനകൊടുത്താണ് ഓരോ മാറ്റവും കൊണ്ടുവരുന്നത്. ദീര്‍ഘദൂര സര്‍വീസുകളില്‍ 12 മുതല്‍ 16 മണിക്കൂര്‍ വരെ ഡ്രൈവര്‍മാരും കണ്ടക്ടര്‍മാരും തുടര്‍ച്ചയായി ഡ്യൂട്ടി എടുക്കേണ്ടി വരുന്നതു റോഡ് അപകടങ്ങള്‍ വര്‍ധിച്ചു വരുന്നതിനും ജീവനക്കാര്‍ക്കു മാനസിക സംഘര്‍ഷങ്ങള്‍ ഉണ്ടാകുന്നതിനും കാരണമാകുന്നു എന്നു മൂന്നു വര്‍ഷം ആരോഗ്യവകുപ്പില്‍ പ്രവര്‍ത്തിച്ച തനിക്കു ബോധ്യമായെന്നും അതിനാലാണു നടപടികളെടുത്തതെന്നും സിഎംഡി ബിജു പ്രഭാകര്‍ വ്യക്തമാക്കി.
