മുഖ്യമന്ത്രിയുടെ പൊളിറ്റിക്കൽ സെക്രട്ടറി പി ശശിയെ രൂക്ഷമായി വിമർശിച്ച് കൊടുവള്ളി മുൻ എംഎൽഎ റസാഖ് കാരാട്ട് രംഗത്തെത്തി. പി ശശിയുടേത് അഹങ്കാരം നിറഞ്ഞ നിലപാടാണെന്നും സിപിഎം സഹയാത്രികർക്ക് യോജിക്കാൻ കഴിയില്ലെന്നും റസാഖ് കാരാട്ട് പറഞ്ഞു.
പി വി അൻവറിന് പിന്നാലെയാണ് പി ശശിക്കെതിരെ വിമര്‍ശനവുമായി കാരാട്ട് റസാഖ് രംഗത്തെത്തിയിരിക്കുന്നത്. പി ശശി ധിക്കാരിയും അഹങ്കാരിയുമാണെന്നും പദവിയുപയോഗിച്ച് ഉദ്യോഗസ്ഥരുടെ കൊള്ളയ്ക്കും കൊലയ്ക്കും പി ശശി സംരക്ഷണം നല്‍കുകയാണെന്നും കാരാട്ട് റസാഖ് വിമർശിച്ചു. പാര്‍ട്ടിക്കാര്‍ക്കല്ല കള്ളന്മാര്‍ക്കും കൊള്ളക്കാര്‍ക്കുമാണ് ശശി പരിഗണന നൽകുന്നതെന്നും റസാഖ് പറഞ്ഞു.
‘പൊളിറ്റിക്കൽ സെക്രട്ടറി പി ശശിയുടെ ധിക്കാരപരവും അഹങ്കാരം നിറഞ്ഞതുമായ നിലപാട് സിപിഎം സഹയാത്രികർക്ക് യോജിക്കാൻ കഴിയുന്നതല്ല’- റസാഖ് കാരാട്ടിന്റെ ഫേസ്ബുക്ക് പോസ്റ്റ്.
മുഖ്യമന്ത്രിയുടെ പൊളിറ്റിക്കൽ സെക്രട്ടറി പി. ശശിയെ കടന്നാക്രമിച്ച് നിലമ്പൂർ എംഎൽഎ പി വി അൻവർ കഴിഞ്ഞ ദിവസം രംഗത്തെത്തിയിരുന്നു. പി. ശശി പരാജയമാണെന്ന് പി വി അൻവർ പറഞ്ഞിരുന്നു. പി. ശശി ഉത്തരവാദിത്വം നിർവഹിച്ചിട്ടില്ലെന്നും പി വി അൻവർ കുറ്റപ്പെടുത്തിയിരുന്നു.
