സ്ത്രീകളുടെ വിവാഹപ്രായം ഉയർത്താനുള്ള തീരുമാനത്തിന് പിന്നിൽ കേന്ദ്രത്തിന് ഗൂഢലക്ഷ്യമെന്ന് എഐസിസി ജനറൽ സെക്രട്ടറി കെ.സി വേണുഗോപാൽ. ഇത് സംബന്ധിച്ച് ബിൽ ലോക്സഭയിൽ വരുമ്പോൾ കോൺഗ്രസ് നിലപാട് വ്യക്തമാക്കും. കോൺഗ്രസ് അതിന്റെ നേതാക്കളുമായും ബന്ധപ്പെട്ട ആളുകളുമായും ആലോചിച്ച് ആയിരിക്കും തീരുമാനം എടുക്കുക. നിയമങ്ങളിലൂടെ പരിഷ്‌ക്കാരമല്ല മറിച്ച് ജനങ്ങളുടെ വിഭജനമാണ് കേന്ദ്ര സർക്കാരിന്റെ ലക്ഷ്യമെന്നും കെ.സി വേണുഗോപാൽ പറഞ്ഞു.
സ്ത്രീശാക്തീകരത്തെക്കുറിച്ച് പറയുന്നവർ ആദ്യം ചെയ്യേണ്ടത് അവരുടെ മുന്നിൽ ഉള്ള വനിത സംവരണ ബിൽ പാസാക്കുകയാണ്. 33 ശതമാനം സ്ത്രീകൾ നിയമസഭയിലും പാർലമെന്റിലും വന്നാൽ അതിലും വലിയ സ്ത്രീശാക്തീകരണം ഇല്ല എന്നുള്ളതാണ് കോൺഗ്രസ് നിലപാട്. കേന്ദ്ര സർക്കാർ എന്തിനാണ് അതിൽ നിന്നും ഒളിച്ചോടുന്നത് എന്നും കെ സി വേണുഗോപാൽ ചോദിച്ചു.
കെ റെയിൽ വിഷയത്തിൽ പഠിച്ച ശേഷം നിലപാട് വ്യക്തമാക്കുമെന്ന തരൂരിന്റെ പ്രസ്താവനയിൽ തെറ്റൊന്നും കാണുന്നില്ല. വ്യത്യസ്തമായ നിലപാട് സ്വീകരിക്കാൻ സ്വാതന്ത്ര്യമുള്ള പാർട്ടിയാണ് കോൺഗ്രസ് പാർട്ടി. പക്ഷെ പാർട്ടി ഔദ്യോഗികമായി ഒരു നിലപാട് എടുക്കുന്നത് വരെ മാത്രമേ അത് പാടുള്ളൂ. പാർട്ടി എല്ലാവരുമായും ചർച്ച ചെയ്യും അതിന് ശേഷം ഒരു നിലപാട് എടുക്കും ആ നിലപാടുമായെ പ്രവർത്തകർക്ക് മുന്നോട്ട് പോകാൻ സാധിക്കുകയുള്ളൂ. പാർട്ടി ഒരു തീരുമാനമെടുത്താൽ അതിനോടൊപ്പം തരൂരും നിൽക്കേണ്ടി വരുമെന്ന് വേണുഗോപാൽ പറഞ്ഞു.
Read more
സ്ത്രീകളുടെ വിവാഹപ്രായം 18 വയസ്സിൽ നിന്ന് 21 ആക്കി ഉയർത്താനുള്ള കേന്ദ്ര കാബിനറ്റ് തീരുമാനത്തിൽ ദുരൂഹതയുണ്ടെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണനും പറഞ്ഞിരുന്നു. അത്തരമൊരു നിയമത്തിന്റെ ആവശ്യം ഇപ്പോഴില്ലെന്നും കോടിയേരി പറഞ്ഞു.
