സിപിഎം സംസ്ഥാന സെക്രട്ടറി എം.വി.ഗോവിന്ദന്‍ നയിക്കുന്ന ജനകീയ പ്രതിരോധ ജാഥയില്‍ പങ്കെടുക്കാന്‍ തൊഴിലുറപ്പ് തൊഴിലാളികള്‍ക്ക് ഭീഷണി. സിപിഎം പഞ്ചായത്ത് മെമ്പറുടെ ഭീഷണി മുഴക്കിയിരിക്കുന്നത്. കണ്ണൂര്‍ മയ്യില്‍ പഞ്ചായത്ത് ഒന്നാം വാര്‍ഡ് അംഗം സി. സുചിത്രയാണ് തൊഴിലുറപ്പ് തൊഴിലാളികളുടെ വാട്‌സാപ്പ് ഗ്രൂപ്പില്‍ ഭീഷണി സന്ദേശമയച്ചത്.
എല്ലാവരും ഒഴിഞ്ഞു പോകാതെ ജാഥയില്‍ പങ്കെടുക്കണമെന്നായിരുന്നു വാട്‌സാപ് സന്ദേശം. ജാഥയ്ക്ക് എത്താത്തവര്‍ക്കു പിന്നീടു ജോലി നല്‍കേണ്ടി വരുമോയെന്നതു ചിന്തിക്കേണ്ടി വരുമെന്നും ശബ്ദ സന്ദേശത്തിലുണ്ട്.
”തളിപ്പറമ്പില്‍ രാവിലെ ജാഥ എത്തുമ്പോള്‍ എല്ലാ തൊഴിലുറപ്പു തൊഴിലാളികളും പങ്കെടുക്കണം. നമ്മുടെ വാര്‍ഡില്‍ പ്രത്യേക മസ്റ്റ് റോള്‍ ഇല്ലാത്തതുകൊണ്ടാണ് ഇങ്ങനെ പറയേണ്ടിവരുന്നത്. പണിയുള്ള വാര്‍ഡുകളില്‍ എല്ലാം കൃത്യമായി ലീവാക്കിയാണ് പോകുന്നത്. ആരും ഒഴിഞ്ഞുപോകാതെ മുഴുവന്‍ ആളുകളും ജാഥയില്‍ പങ്കെടുക്കണം, വരാന്‍ സാധിക്കാത്തവര്‍ എന്നെ വിളിക്കണം. അവരോട് അതിന്റെ ഉത്തരം ഞാന്‍ തന്നേക്കാം.
Read more
പരിപാടിക്കൊന്നും പോകാത്ത ആള്‍ക്കാര്‍ ആണെങ്കില്‍ അടുത്ത പണിയുടെ കാര്യം അന്നേരം നമ്മള്‍ ചിന്തിക്കാമെന്നും ഇവര്‍ വാട്‌സാപ്പില്‍ പങ്കുവെച്ച സന്ദേശത്തില്‍ പറയുന്നു. എംവി ഗോവിന്ദന്റെ ജാഥയില്‍ ആളെ കൂട്ടാന്‍ തൊഴിലുറപ്പ് തൊഴിലാളികളെ ഭീഷണിപ്പെടുത്തിയതിനെതിരെ കോണ്‍ഗ്രസ് രംഗത്തെത്തിയിട്ടുണ്ട്.
