തൃശൂരില്‍ എക്‌സൈസ് ഓഫീസില്‍ വിജിലന്‍സ് നടത്തിയ പരിശോധനയില്‍ അനധികൃതമായി സൂക്ഷിച്ച പണവും മദ്യക്കുപ്പികളും പിടിച്ചെടുത്തു. തൃശൂര്‍ എക്‌സൈസ് ഇന്‍സ്‌പെക്ടര്‍ അശോക് കുമാറിന്റെ ഓഫീസില്‍ വിജിലന്‍സ് നടത്തിയ പരിശോധനയിലാണ് പണവും മദ്യക്കുപ്പികളും പിടിച്ചെടുത്തത്.
എക്‌സൈസ് വാഹനത്തില്‍ അനധികൃതമായി സൂക്ഷിച്ചിരുന്ന 10 കുപ്പി മദ്യവും 42,000 രൂപയും ഇന്‍സ്‌പെക്ടര്‍ അശോക് കുമാറിന്റെ പക്കല്‍ നിന്ന് 32,000 രൂപയുമാണ് വിജിലന്‍സ് ഡിവൈഎസ്പി ഷിബുവിന്റെ നേതൃത്വത്തില്‍ നടത്തിയ പരിശോധനയില്‍ കണ്ടെത്തിയത്. ഉദ്യോഗസ്ഥര്‍ക്കിടയിലെ അഴിമതി കണ്ടെത്താന്‍ രൂപീകരിച്ച പ്രത്യേക ടീമാണ് പരിശോധന നടത്തിയത്.
Read more
പരിശോധനയ്ക്ക് മുന്‍പായി തന്റെ പക്കല്‍ 4,000 രൂപ മാത്രമാണുള്ളതെന്നായിരുന്നു അശോക് കുമാര്‍ വിജിലന്‍സിന് നല്‍കിയ മൊഴി. എന്നാല്‍ അശോക് കുമാറില്‍ നിന്ന് മാത്രമായി വിജിലന്‍സ് 36,000 രൂപ കണ്ടെത്തി. തുടര്‍ന്നാണ് 32,000 രൂപ അനധികൃതമായി കൈപ്പറ്റിയതാണെന്ന് വ്യക്തമായത്.
