ബെംഗളൂരുവിൽ കാറിൽ സഞ്ചരിക്കുകയായിരുന്ന മലയാളി കുടുംബത്തിന് നേരേ ആക്രമണം. കാർ തടഞ്ഞുനിർത്തി ബൈക്കിലെത്തിയ സംഘം ആക്രമിക്കുക ആയിരുന്നു. കാറിൻ്റെ ചില്ലു തകർത്തുള്ള കല്ലേറിൽ പിൻസീറ്റിലിരുന്ന അഞ്ചു വയസുകാരന് തലയ്ക്ക് പരിക്കേറ്റു. ബുധനാഴ്ച രാത്രി ഒൻപതരയ്ക്ക് കസവനഹള്ളിക്കു സമീപം ചൂഡസാന്ദ്രയിലാണ് സംഭവം.
ബെംഗളൂരുവിൽ സോഫ്റ്റ്വേർ എൻജിനിയറായ കോട്ടയം പാലാ സ്വദേശി അനൂപ് ജോർജിന്റെ കാറാണ് ആക്രമിക്കപ്പെട്ടത്. അനൂപും കുടുംബവും ബുധനാഴ്ച രാത്രി നഗരത്തിലിറങ്ങിയശേഷം മടങ്ങുന്നതിനിടെ വീടിൻ്റെ രണ്ടു കിലോമീറ്റർ അകലെനിന്നായിരുന്നു സംഭവം.പരപ്പന അഗ്രഹാര പോലീസ് കേസെടുത്തു. സംഭവത്തിൽ രാത്രി തന്നെ ഒരാളെ കസ്റ്റഡിയിലെടുത്തു.
അനൂപിന്റെ ഭാര്യ ജിസ്, മക്കളായ സെലെസ്റ്റെ (11), സ്റ്റീവ് (5) എന്നിവരുമാണ് കാറിലുണ്ടായിരുന്നത്. കാർ ചൂഡസാന്ദ്രയിലെത്തിയപ്പോൾ രണ്ടുപേർ ബൈക്കിൽ മറികടന്നെത്തി മുൻപിലുണ്ടായിരുന്ന കാർ തടഞ്ഞുനിർത്തി. ഈ കാറിലുണ്ടായിരുന്നവരോട് ഗ്ലാസ് താഴ്ത്താൻ അക്രമികൾ ആവശ്യപ്പെട്ടു. എന്നാൽ, ഗ്ലാസ് താഴ്ത്താൻ അവർ തയ്യാറായില്ല. തുടർന്ന് കാർ മുന്നോട്ട് എടുത്തപ്പോൾ അക്രമികളിൽ ഒരാൾ കരിങ്കല്ല് എടുത്ത് കാറിന്റെ ഗ്ലാസിന് നേരെ എറിയുകയായിരുന്നു.
Read more
കല്ല് തലയിൽ കൊണ്ട് പരിക്കേറ്റ മകനെ ഉടൻ തന്നെ ആശുപത്രിയിൽ എത്തിച്ചു. ആസൂത്രിതമായ ആക്രമണമാണോയെന്ന് സംശയമുണ്ടെന്ന് അനൂപ് പറഞ്ഞു. ആശുപത്രിയിലെത്തിയപ്പോൾ രണ്ടുപേർ പിന്തുടർന്നെത്തി ഒത്തുതീർപ്പാക്കാമെന്ന് പറഞ്ഞു. എന്നാൽ, നിയമനടപടിയുമായി മുന്നോട്ടു പോകാനാണ് തീരുമാനമെന്ന് അനൂപ് പറഞ്ഞു.
