സമീപഭാവിയിൽ കോൺഗ്രസ് ആന്ധ്രാപ്രദേശിൽ അധികാരത്തിൽ തിരിച്ചെത്തുമെന്ന് കർണാടക ഉപമുഖ്യമന്ത്രി ഡി കെ ശിവകുമാർ. കോൺഗ്രസ് പ്രവർത്തക സമിതി അംഗം എൻ രഘുവീര റെഡ്ഡിയ്‌ക്കൊപ്പം വിജയവാഡ സന്ദർശിക്കുകയായിരുന്നു ഡികെ.
‘രാഷ്ട്രീയത്തിൽ ഒന്നും ശാശ്വതമല്ല. ഇന്ന് നിങ്ങൾക്ക് പ്രാതിനിധ്യം കാണിക്കാൻ ഒരു സംഖ്യയില്ലായിരിക്കാം, പക്ഷേ കോൺഗ്രസ് പാർട്ടി കേന്ദ്രത്തിൽ അധികാരത്തിൽ വരുമ്പോൾ സ്ഥിതി മാറും, ആന്ധ്രാപ്രദേശിലെ പാർട്ടി യൂണിറ്റ് ശക്തിപ്പെടുത്തുന്നതിന് പൂർണ പിന്തുണ നൽകുമെന്നും, ”ശിവകുമാർ പറഞ്ഞു.
സംസ്ഥാനത്ത് പാർട്ടിയുടെ സാധ്യതകൾ മെച്ചപ്പെടുമെന്ന് ആന്ധ്ര കോൺഗ്രസ് നേതാക്കളോടും കേഡറുകളോടും ഡി കെ പറഞ്ഞു. 2014-ൽ ആന്ധ്രാപ്രദേശ് വിഭജിക്കാനുള്ള തീരുമാനത്തെത്തുടർന്ന് കോൺഗ്രസ് അതിന്റെ പതനം കണ്ടു. അതിനുശേഷം, പാർട്ടിക്ക് പ്രകടനം മെച്ചപ്പെടുത്താൻ കഴിഞ്ഞില്ല.
“പാർട്ടിയുടെ സംസ്ഥാന ഘടകത്തിന് ഇന്ന് നിയമസഭയിലോ പാർലമെന്റിലോ ഒരു പ്രതിനിധി പോലുമില്ലായിരിക്കാം, എന്നാൽ ഇത് ശാശ്വതമായ ഒരു സവിശേഷതയല്ല. സൂര്യാസ്തമയത്തിനു ശേഷം ഒരു ഉദയം ഉണ്ട്. അതാണ് പ്രകൃതിയുടെ നിയമം.” താഴേത്തട്ടിൽ നിന്ന് പാർട്ടി കെട്ടിപ്പടുക്കാൻ നേതാക്കളെ പ്രേരിപ്പിച്ചു കൊണ്ട് ഡികെ ശിവകുമാർ പറഞ്ഞു,
കേന്ദ്രത്തിൽ പാർട്ടി സർക്കാർ രൂപീകരിച്ചാൽ ആന്ധ്രാപ്രദേശിന് പ്രത്യേക പദവി നൽകുമെന്നും ഡികെ വാഗ്ദാനം ചെയ്തു. ദേശീയ കാഴ്ചപ്പാടുള്ള ഒരു പാർട്ടിക്ക് മാത്രമേ ആന്ധ്രാപ്രദേശ് സംസ്ഥാനം വികസിപ്പിക്കാൻ കഴിയൂ. അത് കേന്ദ്രസർക്കാർ ഫണ്ടിനെ ആശ്രയിക്കുന്ന വൈഎസ്ആർസിപി, ടിഡിപി തുടങ്ങിയ പ്രാദേശിക പാർട്ടികളല്ലെന്നും ഡികെ പറഞ്ഞു. വൈഎസ്ആർസിപിയെയും ടിഡിപിയെയും “കുടുംബ പാർട്ടികൾ” എന്നാണ് ഡികെ പരിഹസിച്ചത്.
Read more
അയൽസംസ്ഥാനമായ തെലങ്കാനയിലെ നിയമസഭാ തെരഞ്ഞെടുപ്പിനെക്കുറിച്ചും ഡികെ പരാമർശിച്ചു. അവിടെയും കോൺഗ്രസ് പാർട്ടിക്ക് അനുകൂലമായ തരംഗമുണ്ടെന്നും തെലങ്കാനയിലും കേന്ദ്രത്തിലും കോൺഗ്രസ് അധികാരത്തിൽ തിരിച്ചെത്തുമെന്നും ഡി കെ ശിവകുമാർ പറഞ്ഞു.
