തിരഞ്ഞെടുപ്പ് പ്രചാരണം ആരംഭിച്ച ഗോവയില്‍ ശാസ്ത്രസാങ്കേതിക വകുപ്പ് മന്ത്രി മൈക്കല്‍ ലോബോ രാജി വെച്ചു. ഇന്ന് നാല് മണിക്ക് പനജിയില്‍ നടക്കുന്ന ചടങ്ങില്‍ ലോബോ കോണ്‍ഗ്രസില്‍ ചേരും. ബി.ജെ.പിയുടെ പ്രവര്‍ത്തനത്തില്‍ താനും പ്രവര്‍ത്തകരും അതൃപ്തരാണെന്നും അതുകൊണ്ടാണ് രാജിയെന്നും ലോബോ പ്രതികരിച്ചു.
മുന്‍ മുഖ്യമന്ത്രിയും പാര്‍ട്ടിയുടെ അതികായനുമായിരുന്ന മനോഹര്‍ പരീക്കറിനൊപ്പം നിന്ന നേതാക്കളെ നേതൃത്വം അവഗണിക്കുകയാണെന്ന് ലോബോ പറഞ്ഞു. മന്ത്രിയായിരുന്ന ലോബോ ബി.ജെ.പിയിലെ ക്രൈസ്തവ മുഖം കൂടിയായിരുന്നു. ഇതോടെ ബി.ജെപി.യില്‍ നിന്നും രാജിവെയ്ക്കുന്ന ക്രൈസ്തവ എം.എല്‍.എ മാരുടെ എണ്ണം മൂന്നായി. കത്തോലിക്കാ വിഭാഗത്തിന് സ്വാധീനമുള്ള കലാങ്കൂത്ത് മണ്ഡലത്തില്‍ നിന്നുള്ള ജനപ്രതിനിധിയാണ് മൈക്കല്‍ ലോബോ.
Read more
സിയോലിം മണ്ഡലത്തില്‍ ഭാര്യ ദലീലയെ മത്സരിപ്പിക്കണമെന്ന ആവശ്യം ലോബോ മുന്നോട്ട് വെച്ചിട്ടുണ്ട്. ഇതേ ആവശ്യം ബിജെപി നേതൃത്വത്തിന് മുന്നില്‍ വെച്ചിരുന്നെങ്കിലും പരിഗണിക്കപ്പെട്ടിരുന്നില്ല. സിലിഗാവോ മണ്ഡലത്തിലെ കോണ്‍ഗ്രസ് സ്ഥാനാര്‍ത്ഥി കേദാര്‍ നായിക്കിന്റെ പ്രചാരണത്തിന് ഞായറാഴ്ച ലോബോ പരസ്യമായി രംഗത്തിറങ്ങിയിരുന്നു. 2017 ല്‍ 17 അംഗങ്ങളുമായി സംസ്ഥാനത്ത് കോണ്‍ഗ്രസ് ഒറ്റ കക്ഷി ആയിരുന്നെങ്കിലും 13 സീറ്റുകള്‍ മാത്രം നേടിയ ബിജെപി പ്രാദേശിക പാര്‍ട്ടികളുടെയും സ്വതന്ത്രരുടെയും പിന്തുണയോടെ അധികാരത്തില്‍ എത്തുകയായിരുന്നു. ഫെബ്രുവരി 14 നാണ് തിരഞ്ഞെടുപ്പ്.
