കുട്ടികൾക്കെതിരായ ലൈംഗിക അതിക്രമങ്ങൾക്ക് വധശിക്ഷ വരെ നൽകാൻ വ്യവസ്ഥ ചെയ്ത് യുഎഇയിൽ നിയമ പരിഷ്‌കാരം. ബലാത്സംഗത്തിനും, സമ്മതമില്ലാതെയുള്ള ലൈംഗിക ബന്ധത്തിനും ജീവപര്യന്തം തടവും, കുട്ടികളാണ് ഇരയെങ്കിൽ വധശിക്ഷ വരെ നൽകാനുമാണ് വ്യവസ്ഥ. ഫെഡറൽ ക്രൈം ആൻഡ് പണിഷ്‌മെന്റ് നിയമം പരിഷ്‌കരിച്ചാണ് പുതിയ നിയമം നടപ്പിലാക്കുന്നത്. ഇതിന് യുഎഇ പ്രസിഡന്റ് ഷെയ്ഖ് ഖലീഫ് ബിൻ സായിദ് അൽ നഹ്യാൻ അംഗീകാരം നൽകി.
ഇരയ്ക്ക് 18 വയസ്സിന് താഴെ പ്രായമോ, അംഗവൈകല്യമോ മറ്റോ ഉണ്ടെങ്കിലോ, പ്രതിരോധിക്കാൻ കഴിയാത്ത അവസ്ഥയിലാണെങ്കിലോ വധശിക്ഷ വരെ നൽകിയേക്കും. ലൈംഗിക അതിക്രമങ്ങൾക്ക് 10 വർഷത്തിൽ കുറയാത്തതും 25 വർഷത്തിൽ കൂടാത്തതുമായ തടവുശിക്ഷയായാണ് വിധിക്കുക. ജോലി സ്ഥലങ്ങളിലോ, പഠനസ്ഥലത്തോ മറ്റു സംരക്ഷണ കേന്ദ്രങ്ങളിലോ വച്ച് ലൈംഗിക അതിക്രമങ്ങൾക്ക് ഇരയായാൽ പ്രതികൾക്ക് ശിക്ഷ വീണ്ടും കഠിനമാക്കും. അപമര്യാദയായി പെരുമാറിയാൽ 10,000 ദിർഹത്തിൽ കുറയാത്ത പിഴ ഈടാക്കും. ഇതിന് പുറമേ തടവ് ശിക്ഷയും അനുഭവിക്കണം. ലിംഗഭേദമില്ലാതെ ശിക്ഷ ഉറപ്പാക്കും. കുറ്റകൃത്യത്തിനിടെ ഭീഷണിയോ ബലപ്രയോഗമോ നടത്തിയിട്ടുണ്ടെങ്കിൽ അഞ്ചു മുതൽ 20 വർഷം വരെ തടവ് ലഭിക്കും.
Read more
പുതുക്കിയ നിയമങ്ങൾ സ്ത്രീകൾക്കും, വീട്ടുജോലിക്കാർക്കും, കുട്ടികൾക്കും കൂടുതൽ നിയമപരിരക്ഷയും സംരക്ഷണവും ഉറപ്പ് നൽകുന്നുണ്ട്. പൊതു ഇടങ്ങളിലെ സുരക്ഷയ്ക്കും പ്രാധാന്യം നൽകുന്നു. ഇതിന് പുറമേ വിവാഹേതര ബന്ധങ്ങൾക്കുള്ള നിയമ പരിഷ്‌കാരങ്ങൾ ലഘൂകരിക്കുകയും ചെയ്തു. യുഎഇയുടെ 50 വർഷത്തെ ചരിത്രത്തിലെ ഏറ്റവും വലിയ നിയമപരിഷ്‌കാരങ്ങളാണ് ഇപ്പോൾ വരുത്തിയിരിക്കുന്നത്. 40 ഓളം നിയമങ്ങൾ ഇതുൾപ്പടെ പരിഷ്‌കരിച്ചട്ടുണ്ട്. 2022 ജനുവരി രണ്ട് മുതൽ പുതുക്കിയ നിയമങ്ങൾ പ്രാബല്യത്തിൽ വരും. രാജ്യത്തിന്റെ സാമ്പത്തിക, നിക്ഷേപ, വാണിജ്യ മേഖലകൾ ശക്തിപ്പെടുത്തുന്നതാണ് പുതിയ പരിഷകാരങ്ങൾ എന്ന് യുഎഇ സർക്കാർ വ്യക്തമാക്കി.
