ഇപ്പോൾ നടക്കുന്ന സൗത്ത് ആഫ്രിക്കൻ ടി-20 പരമ്പരയിലെ മൂന്നാം മത്സരത്തിൽ തകർപ്പൻ സെഞ്ച്വറി നേടിയ താരമായിരുന്നു യുവ താരം തിലക് വർമ്മ. മൂന്നാം മത്സരത്തിൽ നായകനായ സൂര്യ കുമാറിനോട് ചോദിച്ച് വാങ്ങിയ അവസരമായിരുന്നു. ആ അവസരം മുതലാക്കാൻ താരത്തിന് സാധിക്കുകയും ചെയ്തു. അവസാന ടി-20 മത്സരം നടക്കാനിരിക്കെ താരത്തിന് മുട്ടൻ പണിയാണ് കിട്ടിയിരിക്കുന്നത്.
മൂന്നാം ടി-20 മത്സരത്തിനിടയിൽ ബൗണ്ടറി ലൈനില്‍ ക്യാച്ചിന് ശ്രമിക്കവെ തിലക് തലയിടിച്ച് വീഴുകയായിരുന്നു. എന്നാൽ പരിക്ക് ഗുരുതരമല്ല എന്നാണ് ക്യാമ്പിൽ നിന്നും കിട്ടുന്ന വിവരങ്ങൾ. പക്ഷെ അവസാനത്തെ മത്സരത്തിൽ നിന്നും താരം കളിക്കാനുള്ള സാധ്യത വളരെ കുറവാണ്. അതിന്റെ ഔദ്യോഗീകമായ സ്ഥിരീകരണം ഇത് വരെ ടീമിന്റെ ഭാഗത്ത് നിന്ന് ഉണ്ടായിട്ടില്ല.
മികച്ച ഫോമിലുള്ള താരത്തിന്റെ വിടവിനെ നികത്താൻ ഇന്ത്യക്ക് സാധിക്കില്ല എന്നാണ് ആരാധകരുടെ വിലയിരുത്തൽ. കഴിഞ്ഞ മത്സരത്തിൽ തിലകിന്റെ കരുത്തിലായിരുന്നു ഇന്ത്യ മികച്ച സ്‌കോറിൽ എത്തിയതും വിജയിച്ചതും. താരം ഇന്ന് കളിച്ചില്ലെങ്കിൽ നാലാം നമ്പറിലേക്ക് യുവ താരം ജിതേഷ് ശർമ്മയെ ഇറക്കാനായിരിക്കും സാധ്യത.
Read more
ഇന്നത്തെ മത്സരത്തിൽ ഓപ്പണർ സഞ്ജു സാംസണിനും, ക്യാപ്റ്റൻ സൂര്യ കുമാർ യാദവിനും നിർണായകമായിരിക്കും. ആദ്യ മത്സരത്തിൽ സെഞ്ച്വറി തികച്ച സഞ്ജു പിന്നീട് കളിച്ച മത്സരങ്ങളിൽ അടുപ്പിച്ച് പൂജ്യത്തിന് പുറത്താവുകയായിരുന്നു. ഒപ്പം മൂന്നു മത്സരങ്ങൾ കളിച്ച സൂര്യ മൂന്നിലും ഫ്ലോപ്പ് ആയിരുന്നു. ഇന്നത്തെ മത്സരത്തിൽ ഇരുവരും ഗംഭീര പ്രകടനം പുറത്തെടുക്കും എന്ന പ്രതീക്ഷയിലാണ് ക്രിക്കറ്റ് ആരാധകർ.
