നവംബർ 22 ന് പെർത്തിൽ ആരംഭിക്കുന്ന ബോർഡർ-ഗവാസ്‌കർ ട്രോഫിക്ക് മുന്നോടിയായുള്ള ഇൻട്രാ സ്ക്വാഡ് പരിശീലന മത്സരം റദ്ദാക്കിയതിന് സുനിൽ ഗവാസ്‌കർ ഇന്ത്യയെ വിമർശിച്ചു. നവംബർ 15 മുതൽ 17 വരെ ഇന്ത്യ എയ്‌ക്കെതിരെ ദേശീയ ടീം മൂന്ന് ദിവസത്തെ മത്സരം കളിക്കേണ്ടതായിരുന്നു, എന്നാൽ ജോലിഭാരം കാരണം മുതിർന്ന കളിക്കാർ മത്സരം ഉപേക്ഷിക്കാൻ തീരുമാനിച്ചു.
“ഇന്ത്യൻ ക്രിക്കറ്റിൽ ഏറ്റവും കൂടുതൽ ചർച്ച ചെയ്യപ്പെടുന്ന വിഷയമാണ് ജോലിഭാരം കൈകാര്യം ചെയ്യുക. കളി മൂന്ന് ദിവസത്തിനുള്ളിൽ അവസാനിച്ചാലും കളിക്കാർ ഈ പ്രശ്നം ഉയർത്തിക്കാട്ടുന്നു. മുംബൈയിൽ നടന്ന മൂന്നാം ടെസ്റ്റിൽ ഇന്ത്യയെ തോൽപ്പിച്ച് ഒരു ദിവസം കഴിഞ്ഞ് ന്യൂസിലൻഡ് താരങ്ങളിൽ ചിലർ കളത്തിൽ ഇറങ്ങി” അദ്ദേഹം മിഡ് ഡേയിൽ എഴുതി.
“ഇന്ത്യ 57 ദിവസം ഓസ്‌ട്രേലിയയിൽ ഉണ്ടാകും, എന്നാൽ മത്സര ദിവസങ്ങളുടെ എണ്ണം 27 ദിവസമാണ്. അത്രയും ഉള്ളു നിങ്ങളുടെ ജോലിഭാരം,” അദ്ദേഹം കൂട്ടിച്ചേർത്തു. സെന രാജ്യങ്ങളിലെ ആദ്യ ടെസ്റ്റിൽ ഇന്ത്യ തോൽക്കുമെന്നും അതിനാൽ പരമ്പര ആരംഭിക്കുന്നതിന് മുമ്പ് ഒരു സന്നാഹ മത്സരത്തിൻ്റെ പ്രാധാന്യം വർദ്ധിക്കുമെന്നും സുനിൽ ഗവാസ്‌കർ പറഞ്ഞു.
“സെന രാജ്യങ്ങളുടെ ആദ്യ ടെസ്റ്റിൽ ഇന്ത്യ പൊതുവെ തോൽക്കാറുണ്ട്. അതുകൊണ്ടാണ് പെർത്തിലെ ആദ്യ ടെസ്റ്റിന് മുമ്പ് ഇന്ത്യ എയ്‌ക്കെതിരെ കളിക്കുന്നത് അവർക്ക് പ്രധാനമായത്, ”അദ്ദേഹം എഴുതി.
“മൂന്നോ അതിലധികമോ തവണ പുറത്തായതിന് ശേഷവും ബാറ്റർമാർക്ക് നെറ്റ്സിൽ ബാറ്റ് ചെയ്യുന്നത് തുടരാനാകും. പരിശീലന സെഷനുകളിൽ സമ്മർദ്ദമോ ടെൻഷനോ ഇല്ല. നെറ്റ്സിൽ ബാറ്റിംഗും ബൗളിംഗും മത്സരത്തിൽ കളിക്കുന്നതിന് തുല്യമല്ല.
ലോക ടെസ്റ്റ് ചാമ്പ്യൻഷിപ്പിൻ്റെ ഫൈനലിന് യോഗ്യത നേടണമെങ്കിൽ ഇന്ത്യൻ ദേശീയ ക്രിക്കറ്റ് ടീം ഓസ്‌ട്രേലിയയെ 4-0ന് തോൽപ്പിക്കണം.
