വിരാട് കോഹ്‌ലിയുടെ ടെസ്റ്റ് ഫോം മികച്ചതല്ല, എന്നാൽ ഏകദിനത്തിൻ്റെ കാര്യത്തിൽ, ഇന്ത്യൻ വെറ്ററനെക്കാൾ വലിയ മാച്ച് വിന്നർ വേറെ ലോകത്തിൽ ഇല്ല. ഐസിസി ചാമ്പ്യൻസ് ട്രോഫിയിൽ ഇന്ത്യയുടെ പ്രതീക്ഷകളുടെ ഭൂരിഭാഗവും വഹിക്കുന്ന കോഹ്‌ലി ഏകദിന ക്രിക്കറ്റിലെ മഹാന്മാരിലൊരാളാണ്. 2013ൽ എംഎസ് ധോണി ചാമ്പ്യൻസ് ട്രോഫിയിൽ ടീമിനെ വിജയത്തിലെത്തിച്ചതിന് ശേഷം ഇന്ത്യ 50 ഓവർ ഐസിസി ട്രോഫി നേടിയിട്ടില്ല. 2023ലെ ഏകദിന ലോകകപ്പ് നേടുന്നതിന് അടുത്തെത്തിയെങ്കിലും ഫൈനലിൽ ഓസ്‌ട്രേലിയയോട് പരാജയപ്പെട്ടു.
ടെസ്റ്റ് ക്രിക്കറ്റിൽ ന്യൂസിലൻഡിനോടും ഓസ്‌ട്രേലിയയോടും തുടർച്ചയായി തോൽവി ഏറ്റുവാങ്ങിയതിന് ശേഷം ആത്മവിശ്വാസം വീണ്ടെടുക്കാനും ടൂർണമെൻ്റ് ജയിക്കാനും ഇന്ത്യ ആഗ്രഹിക്കുന്നു. അതേസമയം, ഏകദിന ക്രിക്കറ്റിൽ വിരാട് കോഹ്‌ലി ചരിത്ര നേട്ടത്തിലേക്ക് അടുക്കുകയാണ്. 300-ൽ താഴെ ഇന്നിംഗ്‌സുകളിൽ നിന്ന് 14000 ഏകദിന റൺസ് തികയ്ക്കുന്ന ലോകത്തിലെ ആദ്യ ബാറ്റ്‌സ്‌കാരനാകാൻ കോഹ്‌ലിക്ക് ഇനി 96 റൺസ് മാത്രം.
സച്ചിൻ ടെണ്ടുൽക്കറും കുമാർ സംഗക്കാരയും മാത്രമാണ് ഏകദിന ക്രിക്കറ്റിൽ 14,000 കടന്നത്. 14000 റൺസ് തികയ്ക്കാൻ സച്ചിൻ 350 ഇന്നിംഗ്‌സുകൾ എടുത്തപ്പോൾ സംഗക്കാര 378 ഇന്നിംഗ്‌സുകളിൽ നിന്നാണ് നാഴികക്കല്ലിലെത്താൻ എടുത്തത്. 295 മത്സരങ്ങളിൽ നിന്നായി 13906 റൺസാണ് കോഹ്‌ലിയുടെ സമ്പാദ്യം. ഐസിസി ചാമ്പ്യൻസ് ട്രോഫിക്ക് മുമ്പ് ഇന്ത്യ ഇംഗ്ലണ്ടിനെതിരെ മൂന്ന് മത്സരങ്ങളുടെ ഏകദിന പരമ്പര കളിക്കും, ഈ പരമ്പരയിൽ തന്നെ കോഹ്‌ലിക്ക് റെക്കോർഡ് തകർക്കാനാകും.
കുമാർ സംഗക്കാരയെ മറികടന്ന് ഏകദിന ക്രിക്കറ്റിൽ ഏറ്റവും കൂടുതൽ റൺസ് നേടുന്ന രണ്ടാമത്തെ താരമാകാനും വിരാട് കോലിക്ക് കഴിയും. സംഗക്കാര ഏകദിന ക്രിക്കറ്റിൽ 14243 റൺസ് നേടിയിട്ടുണ്ട്, ശ്രീലങ്കൻ ഇതിഹാസത്തെ മറികടക്കാൻ കോഹ്‌ലിക്ക് വേണ്ടത് 329 റൺസ് മാത്രം. ഐസിസി ചാമ്പ്യൻസ് ട്രോഫിയിൽ കോഹ്‌ലിക്ക് ഈ റെക്കോർഡ് തകർക്കാനാകും. ദുബായ് ഇൻ്റർനാഷണൽ സ്റ്റേഡിയത്തിൽ നടക്കുന്ന ലീഗ് മത്സരങ്ങളിൽ ഇന്ത്യ ബംഗ്ലാദേശ്, പാകിസ്ഥാൻ, ശ്രീലങ്ക ടീമുകളെ നേരിടും. മൂന്ന് മത്സരങ്ങളിൽ രണ്ടെണ്ണം ജയിച്ചാൽ അതേ വേദിയിൽ സെമിഫൈനലിന് യോഗ്യത നേടും.
