ഇന്ത്യ – പാകിസ്ഥാൻ മത്സരം നടക്കുന്നത് പോലെ ലോകം മുഴുവൻ ആവേശം വിതക്കുന്ന മറ്റൊരു മത്സരം ഉണ്ടോ എന്ന് ചോദിച്ചാൽ അതിന് ഇല്ലെന്നു തന്നെയാണ് ഉത്തരം. ഇരു രാജ്യങ്ങളും തമ്മിലുള്ള നയതന്ത്ര സംഘർഷങ്ങൾ കാരണം ഇന്ത്യയും പാകിസ്ഥാനും പോരാട്ടം ക്രിക്കറ്റ് ലോകത്തിന് നഷ്ടമായിരിക്കുകയാണ്.
2012-ലെ ഹോം ലിമിറ്റഡ് ഓവർ പരമ്പരയ്ക്ക് ശേഷം ഇന്ത്യ പാകിസ്ഥാനുമായി ഉഭയകക്ഷി ക്രിക്കറ്റിൽ കളിച്ചിട്ടില്ല. ഈ കാലയളവിൽ, അവർ ലോകകപ്പ് പോലുള്ള മൾട്ടി-രാഷ്‌ട്ര ടൂർണമെന്റുകളിൽ മാത്രമാണ് ഏറ്റുമുട്ടിയത്. ഏഷ്യ കപ്പിൽ ഇരുരാജ്യങ്ങളും നേർക്കുനേർ വന്നാൽ പോലും മത്സരം ഒരു ന്യൂട്രൽ വേദിയിൽ ആയിരിക്കും നടക്കുക.
ഇരു രാജ്യങ്ങളും തമ്മിലുള്ള രാഷ്ട്രീയ ബന്ധം കണക്കിലെടുക്കുമ്പോൾ, ഇന്ത്യ-പാകിസ്ഥാൻ ഉഭയകക്ഷി പരമ്പര നടക്കാനുള്ള സാധ്യത വളരെ വിരളം എന്നാണ് ആരാധകർ പറയുന്നത്. എന്നിരുന്നാലും, ബുധനാഴ്ച (ജനുവരി 10) ഒരു മാധ്യമ ആശയവിനിമയത്തിനിടെ പാകിസ്ഥാൻ ക്രിക്കറ്റ് ബോർഡ് (പിസിബി) ചെയർമാൻ സാക്ക അഷ്റഫ് രസകരമായ ഒരു പ്രസ്താവന നടത്തി.
“ഇന്ത്യ-പാകിസ്ഥാൻ പരമ്പരയെ സംബന്ധിച്ചിടത്തോളം, സർക്കാർ അനുമതി വന്നാൽ രണ്ട് ബോർഡുകളും പരസ്പരം കളിക്കാൻ തയ്യാറാണ്,” സക്കാ അഷ്റഫ് പറഞ്ഞതായി pcb.com.pk ഉദ്ധരിച്ചു. ഈ പ്രസ്താവനയ്ക്ക് ശേഷം ബിസിസിഐയിൽ നിന്ന് പ്രതികരണമൊന്നും ഉണ്ടായിട്ടില്ലെങ്കിലും അതിർത്തി കടന്നുള്ള ഭീകരവാദവും ഇന്ത്യയിലെ നുഴഞ്ഞുകയറ്റവും അവസാനിപ്പിക്കുന്നതുവരെ പാകിസ്ഥാനുമായി ഉഭയകക്ഷി ക്രിക്കറ്റ് ഉണ്ടാകില്ലെന്ന് കേന്ദ്ര കായിക മന്ത്രി അനുരാഗ് താക്കൂർ കഴിഞ്ഞ വർഷം പറഞ്ഞിരുന്നു.
“ഭീകരവാദം, അതിർത്തി കടന്നുള്ള ആക്രമണങ്ങൾ, നുഴഞ്ഞുകയറ്റം എന്നിവ അവസാനിപ്പിക്കുന്നത് വരെ ഞങ്ങൾ പാകിസ്ഥാനുമായി ഉഭയകക്ഷി മത്സരങ്ങൾ കളിക്കില്ലെന്ന് ബിസിസിഐ വളരെ നേരത്തെ തീരുമാനിച്ചിരുന്നു. രാജ്യത്തിന്റെയും പൊതുജനങ്ങളുടെയും വികാരവും സമാനമാണെന്ന് ഞാൻ കരുതുന്നു,” താക്കൂർ പറഞ്ഞു.
Read more
2023 ലോകകപ്പിൽ അഹമ്മദാബാദിൽ നടന്ന ഏകദിന മത്സരത്തിലാണ് ഇന്ത്യ അവസാനമായി പാകിസ്ഥാനുമായി കളിച്ചത്, ആ മത്സരത്തിൽ ഇന്ത്യ ഏഴ് വിക്കറ്റിന് ജയിച്ചു. 2024 ജൂൺ 9 ന് ന്യൂയോർക്കിൽ നടക്കുന്ന ടി20 ലോകകപ്പിൽ ചിരവൈരികൾ മത്സരിക്കും.
