ഗുജറാത്ത് ടൈറ്റന്‍സിനോടേറ്റ പരാജയ ഭാരവും വെച്ച് നാളെ സണ്റൈസേഴ്സ് ഹൈദരാബാദിനെ നേരിടാന്‍ ഒരുങ്ങുന്ന രാജസ്ഥാന്‍ റോയല്‍സ് ടീമിന് മുന്നിലേക്ക് മൂന്ന് ചോദ്യങ്ങള്‍വെച്ച് പരിശീലകന്‍ കുമാര്‍ സംഗക്കാര. ഗുജറാത്തിനെതിരായി ദയനീയ തോല്‍വി വഴങ്ങിയ ശേഷം ഡ്രസിംഗ് റൂമില്‍ വച്ച് സംസാരിക്കവെയാണ് സംഗക്കാര താരങ്ങള്‍ക്ക് മുമ്പില്‍ മൂന്നു ചലഞ്ചുകള്‍ വെച്ചിരിക്കുന്നത്.
നമുക്ക് വീണ്ടെടുപ്പിന് ഒരു ദിവസമാണുള്ളത്. നമുക്ക് പിഴവുകളെക്കുറിച്ച് സംസാരിച്ചുകൊണ്ടിരിക്കാം. കൂടാതെ നമുക്കു പഠിക്കാന്‍ കഴിയുന്ന എല്ലാത്തിനെക്കുറിച്ചും ചര്‍ച്ച ചെയ്യാം. പക്ഷെ നിങ്ങളെ സംബന്ധിച്ച് യഥാര്‍ഥ ചോദ്യം ഇതാണ്- മധ്യനിരയില്‍ നമ്മള്‍ നേരിടുന്ന വെല്ലുവിളികള്‍ എങ്ങനെ പരിഹരിക്കാം, സണ്റൈസേഴ്സ് ഹൈദരാബാദുമായുള്ള മല്‍സരത്തിന് എങ്ങനെ തയ്യാറെടുക്കാം, നമുക്ക് അവര്‍ക്കെതിരേ എങ്ങനെ മികച്ച ഗെയിം കളിക്കാം എന്നീ മൂന്നു കാര്യങ്ങളാണ്. നിങ്ങളെല്ലാവരും ഇതേക്കുറിച്ച് ചിന്തിക്കണം. മറ്റൊന്നും തന്നെ പറയാനില്ല സങ്കക്കാര പറഞ്ഞു.
നിലവില്‍ 10 മത്സരങ്ങളില്‍നിന്ന് അഞ്ച് വീതം ജയവും തോല്‍വിയുമായി പോയിന്റ് പട്ടികയില്‍ നാലാം സ്ഥാനത്താണ് റോയല്‍സ്. അവസാനമായി കളിച്ച അഞ്ചു മല്‍സരങ്ങളില്‍ നാലിലും തോല്‍വിയേറ്റു വാങ്ങാനായിരുന്നു റോയല്‍സിന്റെ വിധി. അതിനാല്‍ തന്നെ പ്ലേഓഫ് ഉറപ്പിക്കാന്‍ മുന്നോട്ടുള്ള മത്സരങ്ങളില്‍ ടീമിന് ജയിച്ചേ തീരൂ.
Read more
ഇന്നലെ നടന്ന മത്സരത്തില്‍ ഗുജറാത്തിനെതിരെ ഒന്‍പത് വിക്കറ്റിന്റെ ദയനീയ പരാജയമാണ് റോയല്‍സ് ഏറ്റുവാങ്ങിയത്. രാജസ്ഥാന്‍ ഉയര്‍ത്തിയ 119 റണ്‍സ് വിജയലക്ഷ്യം വെറും 13.5 ഓവറില്‍ ഗുജറാത്ത് മറികടന്നു. ശുഭ്മന്‍ ഗില്ലും (36) വൃദ്ധിമാന്‍ സാഹയും (41 നോട്ടൗട്ട്) ഗുജറാത്തിന് മികച്ച തുടക്കം നല്‍കിയപ്പോള്‍ മൂന്നാമനായി എത്തിയ ഹാര്‍ദിക് പാണ്ഡ്യ (15 പന്തില്‍ 39 നോട്ടൗട്ട്) കൂറ്റനടികളിലൂടെ ജയം വേഗത്തിലാക്കി.
