ഐസിസി പുറത്തിറക്കിയ ഏറ്റവും പുതിയ ഐസിസി ടി20 ഐ റാങ്കിംഗിൽ നിരവധി ഇന്ത്യൻ താരങ്ങൾ മികച്ച നേട്ടം കൈവരിച്ചു. കഴിഞ്ഞ ഞായറാഴ്ച മൂന്ന് മത്സരങ്ങളുള്ള പരമ്പരയിലെ ആദ്യ മത്സരത്തിൽ ബംഗ്ലാദേശിനെ പരാജയപ്പെടുത്തി ഇന്ത്യ മികച്ച വിജയം സ്വന്തമാക്കിയിരുന്നു. സൂര്യകുമാർ യാദവിൻ്റെ നേതൃത്വത്തിലുള്ള ടീം സന്ദർശകരെ ഏഴു വിക്കറ്റിന് തകർത്ത് പരമ്പരയിൽ മുന്നിലെത്തി.
ബംഗ്ലാദേശിനെതിരായ ആദ്യ ടി20യിലെ മികച്ച പ്രകടനമാണ് ഐസിസി ടി20ഐ റാങ്കിങ്ങിൽ നിരവധി ഇന്ത്യൻ താരങ്ങളെ മുന്നേറാൻ സഹായിച്ചത്. ആദ്യ മത്സരത്തിലെ പ്രകടനത്തിന് പിന്നാലെ അർഷ്ദീപ് സിംഗ്, ഹാർദിക് പാണ്ഡ്യ, വാഷിംഗ്ടൺ സുന്ദർ എന്നിവർ ഐസിസി ടി20 റാങ്കിംഗിൽ മുന്നേറി.
ഇന്ത്യക്ക് രണ്ട് സെറ്റ് ബാറ്റ്സ്മാൻമാരെ പെട്ടെന്ന് നഷ്ടമായപ്പോഴാണ് പാണ്ഡ്യ ബാറ്റിംഗിന് ഇറങ്ങിയത്. അവിടെ നിന്ന്, വെറും 16 പന്തിൽ നിന്ന് 39 റൺസ് അടിച്ചുകൂട്ടിയ അദ്ദേഹം ഇന്ത്യയുടെ ബാറ്റിംഗിനെ മുന്നോട്ട് നയിച്ചു. അഞ്ച് ഫോറും രണ്ട് സിക്‌സും അടങ്ങുന്നതായിരുന്നു അദ്ദേഹത്തിൻ്റെ ഇന്നിങ്‌സ്.
തൻ്റെ മാച്ച് വിന്നിംഗ് പ്രകടനത്തിന് പിന്നാലെ സിസി ടി20 ഐ റാങ്കിംഗിൽ പാണ്ഡ്യ ഏഴ് സ്ഥാനങ്ങൾ കയറി മൊത്തത്തിൽ 60-ാം സ്ഥാനത്തെത്തി. നിലവിൽ ലോകത്തിലെ ഒന്നാം നമ്പർ ടി20 ബാറ്റ്സ്മാനാണ് ഓസ്ട്രേലിയയുടെ ട്രാവിസ് ഹെഡ്. പാണ്ഡ്യ ഒരു വിക്കറ്റും വീഴ്ത്തി, ടി20 ഐ ഓൾറൗണ്ടർമാരുടെ ഏറ്റവും പുതിയ റാങ്കിംഗിൽ നാല് സ്ഥാനങ്ങൾ മെച്ചപ്പെടുത്തി മൂന്നാം സ്ഥാനത്തെത്തി. ഓൾറൗണ്ടർമാരുടെ റാങ്കിംഗിൽ ഇംഗ്ലണ്ടിൻ്റെ ലിയാം ലിവിംഗ്സ്റ്റണും നേപ്പാളിൻ്റെ ദിപേന്ദ്ര സിംഗ് ഐറിയും പാണ്ഡ്യയെക്കാൾ മുന്നിലാണ്.
ബൗളർമാരുടെ ടി20 റാങ്കിംഗിൽ അർഷ്ദീപ് എട്ട് സ്ഥാനങ്ങൾ കയറി എട്ടാം സ്ഥാനത്തെത്തി. 12 റൺസ് വഴങ്ങി ഒരു വിക്കറ്റ് വീഴ്ത്തിയ വാഷിംഗ്ടൺ സുന്ദർ നാല് സ്ഥാനങ്ങൾ മെച്ചപ്പെടുത്തി 35-ാം സ്ഥാനത്തെത്തി. നിലവിൽ ലോകത്തെ ഒന്നാം നമ്പർ ടി20 ബൗളർ ഇംഗ്ലണ്ടിൻ്റെ ആദിൽ റഷീദ് ആണ്.
