ശ്രീലങ്കയ്‌ക്കെതിരായ ഏകദിനത്തിൽ അപ്രതീക്ഷിത തോൽവി വഴങ്ങിയ ഇന്ത്യൻ ടീമിന് വിമർശനവുമായി മുൻ പാക് താരം ബാസിത് അലി. പണ്ടൊരുകാലത്ത് നന്നായി സ്പിൻ കളിച്ചിരുന്ന ഇന്ത്യ ഇപ്പോൾ അത് മറന്നു പോയെന്നാണ് മുൻ താരം പറഞ്ഞത്. ഏകദിന ടീമിൽ ഉൾപ്പെടാത്ത ഹാർദിക്, ജഡേജ എന്നിവരുടെ അഭാവം ഇന്ത്യയെ ബാധിക്കുണ്ടെന്നും അദ്ദേഹം പറഞ്ഞു.
‘സ്പിന്നർമാർക്കെതിരെ എങ്ങനെ ബാറ്റുചെയ്യണമെന്ന് പാകിസ്താനുശേഷം ഇന്ത്യയും മറന്നുപോയെന്ന് എനിക്ക് തോന്നുന്നു. ടി 20 മത്സരങ്ങളിൽ കൂടുതലായി ശ്രദ്ധിച്ചതാണ് അതിന് കാരണം എന്ന് എനിക്ക് തോന്നുന്നു. ഇന്ത്യൻ ബാറ്റർമാരിൽ ചിലർ പുറത്തായ രീതി നിരാശപ്പെടുത്തി. ശിവം ദുബൈയും സുന്ദറും ഒകെ പുറത്തായത് അനാവശ്യ ഷോട്ട് കളിക്കാൻ ശ്രമിച്ചായിരുന്നു.”
‘ശിവം ദുബെയെ ടി20യിൽ മാത്രമായി നിലനിർത്തണം. അദ്ദേഹത്തെ ഏകദിനത്തിലേക്ക് തിരഞ്ഞെടുക്കരുത്. അല്ലെങ്കിൽ ദുബെയെ 50 ഓവർ ആഭ്യന്തര മത്സരങ്ങളിൽ കളിപ്പിക്കുക. ഹാർദ്ദിക് പാണ്ഡ്യയും രവീന്ദ്ര ജഡേജയും ഇല്ലാതെ ഇന്ത്യയുടെ ഏകദിന ടീം പൂർണമാവില്ല’, ബാസിത് കൂട്ടിച്ചേർത്തു.
Read more
ഗൗതം ഗംഭീറിൻ്റെ പരിശീലകനായിട്ടുള്ള ആദ്യ പരമ്പരയിൽ ലങ്കയ്ക്ക് എതിരെ ഇറങ്ങിയ ഇന്ത്യ പല്ലേക്കലെയിൽ നടന്ന ആദ്യ ടി20യിൽ 43 റൺസിൻ്റെ വിജയം ഉറപ്പിച്ചു. ഇതേ സ്ഥലത്ത് തുടർന്നുള്ള രണ്ട് ടി20 മത്സരങ്ങളും വിജയിച്ച് അവർ പരമ്പര തൂത്തുവാരി. ശേഷം ആദ്യ ഏകദിനം സമനിലയിൽ കലാശിച്ചപ്പോൾ രണ്ടാം മത്സരത്തിൽ ശ്രീലങ്ക 32 റൺസിന് വിജയിച്ചു. മൂന്നാം മത്സരം നാളെ നടക്കുമ്പോൾ പരമ്പര സമനിലയിൽ അവസാനിപ്പിക്കാൻ ആകും ഇന്ത്യൻ ശ്രമം.
