റയല്‍ മാഡ്രിഡിന്റെ മിന്നും താരമായിരുന്ന സെര്‍ജിയോ റാമോസ് ഇനി പി.എസ്.ജിക്ക് വേണ്ടി കളിക്കും. റയല്‍ വിട്ട സ്പെയിന്‍ താരം രണ്ട് വര്‍ഷത്തേക്ക് പി.എസ്.ജിയുമായി കരാറിലെത്തിയെന്നാണ് റിപ്പോര്‍ട്ടുകള്‍. ഇതു സംബന്ധിച്ച ഔദ്യോഗിക പ്രഖ്യാപനം ഉടനുണ്ടാകുമെന്നാണ് കരുതുന്നത്.
രണ്ട് ദിവസത്തിനുള്ളില്‍ താരം കരാറില്‍ ഒപ്പുവയ്ക്കും. അടുത്ത് തന്നെ റാമോസ് പാരിസിലെത്തി മെഡിക്കല്‍ പൂര്‍ത്തിയാക്കും. റയലില്‍ ലഭിച്ചതിനേക്കാള്‍ കൂടുതലാണ് പി.എസ്.ജിയില്‍ താരത്തിന് ലഭിക്കുന്ന പ്രതിഫലം. അടുത്തിടെയാണ് 35കാരനായ റാമോസിന്റെ റയലിലെ കരാര്‍ അവസാനിച്ചത്. 16 വര്‍ഷത്തോളം റയലിനായി കളിച്ച താരം ടീമില്‍ തുടരുമെന്ന് ആരാധകര്‍ പ്രതീക്ഷിച്ചിരുന്നെങ്കിലും അതുണ്ടായില്ല.
പി.എസ്.ജിയ്ക്ക് പുറമേ മാഞ്ചസ്റ്റര്‍ സിറ്റി, സെവിയ്യ, യുവന്റസ് എന്നിവരും റാമോസിനായി രംഗത്തുണ്ടായിരുന്നു. പി.എസ്.ജിയില്‍ ഇപ്പോള്‍ സെന്റര്‍ ബാക്കുകളായി ഉള്ള മാര്‍ക്കിനസും കിംബെബെയ്ക്കും ഒപ്പം റാമോസും കൂടി എത്തുന്നത് ക്ലബിന്റെ ഡിഫന്‍സ് ശക്തമാക്കും.
Read more
ഹക്കീമി, റാമോസ്, ഡോണരുമ്മ എന്നീ മൂന്ന് കളികാരെയും ടീമിലെത്തിച്ച് കൊണ്ടുള്ള പി.എസ്.ജിയുടെ ഔദ്യോഗിക പ്രഖ്യാപനം ഈ മാസം പകുതിയ്ക്ക് മുമ്പ് ഉണ്ടാകുമെന്നാണ് കരുതുന്നത്.
