വീണ്ടും സ്വർണ്ണ കുതിപ്പിനായി നീരജ് ചോപ്ര കളിക്കളത്തിൽ നിറഞ്ഞാടുന്നു. ഇന്ന് നടന്ന ജാവലിൻ ത്രോ ക്വാളിഫിക്കേഷനിൽ ആദ്യ ത്രോയിൽ തന്നെ 89.34 മീറ്റർ കടന്ന് നീരജ് ചോപ്ര ഫൈനലിലേക്ക് രാജകീയമായി പ്രവേശിച്ചു. ഈ സീസണിലെ താരത്തിന്റെ ഏറ്റവും ഉയർന്ന സ്കോർ ആണ് ഇത്. പാരീസ് ഒളിമ്പിക്സിൽ പുതുചരിത്രം രചിച്ച് ജാവലിൻ ത്രോയിൽ സ്വർണ്ണ മെഡൽ നേടി ഇന്ത്യയെ ഉന്നതിയിൽ കൊണ്ട് വരും എന്നാണ് ആരാധകർ പ്രതീക്ഷിക്കുന്നത്. നിലവിൽ ജാവലിൻ ത്രോയിൽ നീരജ് ആണ് ചാമ്പ്യൻ. ഈ വർഷവും സ്വർണം നേടി അത് നിലനിർത്താനാണ് താരം ശ്രമിക്കുന്നത്.

ഇന്ത്യയുടെ മറ്റൊരു പുരുഷ താരമായ കിഷോര്‍ ജെനക്ക് മികച്ച പ്രകടനം നടത്തിയെങ്കിലും ഫൈനലിലേക്ക് യോഗ്യത നേടുന്നതിൽ താരം പരാജയപെട്ടു. ആദ്യ ത്രോയില്‍ 80.73 മീറ്റര്‍ എറിഞ്ഞ താരത്തിന്റെ പിന്നീടുള്ള രണ്ട് ത്രോയും ഫൗൾ ആയതോടെ കിഷോർ ഒൻപതാം സ്ഥാനത്ത് നിലയുറപ്പിക്കേണ്ടി വന്നു. ആദ്യ ത്രോയിൽ തന്നെ ഫൈനൽ ടിക്കറ്റ് എടുത്ത് പുതിയ ചരിത്രം കുറിച്ച താരമായി നീരജ് ചോപ്ര മാറി. ഗ്രൂപ്പ് ബിയില്‍ മത്സരിച്ചാണ് താരം ഫൈനലിൽ പ്രവേശിച്ചത്.

കഴിഞ്ഞ ഒളിമ്പിക്സിൽ വെള്ളി മെഡൽ നേടിയത് ജര്‍മനിയുടെ ജുലിയന്‍ വെബ്ബര്‍ ആയിരുന്നു. ഇത്തവണ താരം 87.76 മീറ്റര്‍ ദൂരം എറിഞ്ഞ് രണ്ടാമതായി ഫൈനല്‍ റൗണ്ടിലേക്ക് യോഗ്യത നേടി. കൂടാതെ കടുത്ത മത്സരം നൽകാനായിട്ട് പാകിസ്ഥാനും ഒപ്പത്തിനുണ്ട്. 88.63 ദൂരം ജാവലിന്‍ പായിച്ച് പാകിസ്താന്റെ അര്‍ഷാദ് നദീമും ഫൈനല്‍ യോഗ്യത നേടിയെടുത്തു. താരം നേരത്തെ എറിഞ്ഞ വീഡിയോ സമൂഹ മാധ്യമങ്ങളിൽ വൈറൽ ആയിരുന്നു.

എട്ടാം തിയതി ആണ് ഫൈനൽ മത്സരം നടത്താൻ നിശ്‌ചയിച്ചിരിക്കുന്നത്. ഇപ്പോൾ എറിഞ്ഞതിനേക്കാൾ ദൂരത്തിൽ നീരജിനു എറിയാൻ സാധിക്കും എന്നാണ് ആരാധകർ പ്രതീക്ഷിക്കുന്നത്. ഇന്ത്യയുടെ ഈ ഒളിമ്പിക്സിലെ ആദ്യ സ്വർണം നേടാൻ വേണ്ടിയുള്ള പരിശ്രമത്തിലാണ് നീരജ് ചോപ്ര. 2022, 2023ലെ ലോക ഫൈനൽസിലും സ്വര്‍ണ്ണ മെഡല്‍ നേടിയിരുന്നു. കോമണ്‍മെല്‍ത്ത് ഗെയിംസിലും നീരജ് സ്വര്‍ണ്ണം നേടിയിട്ടുണ്ട്.