ഇന്ത്യൻ വിപണിയിൽ പുതിയ ടൊയോട്ട കാമ്രി സെഡാൻ അവതരിപ്പിച്ചിരിക്കുകയാണ് ടൊയോട്ട കിർലോസ്‌കർ മോട്ടോർ. പുതിയ ഡിസൈൻ, പുതിയ ഇൻ്റീരിയർ ലേഔട്ട്, അധിക ഫീച്ചറുകൾ, അധിക സുരക്ഷ എന്നിവയാണ് പുതിയ കാമ്രിയുടെ സവിശേഷതകൾ. മുൻ മോഡലിനേക്കാൾ കൂടുതൽ ഇന്ധനക്ഷമതയും സ്കോഡയുടെ സൂപ്പർബുമായി നേരിട്ട് മത്സരിക്കാൻ പോകുന്ന ഈ മോഡലിനുണ്ട്. സ്കോഡ സൂപ്പർബുമായി നേരിട്ടായിരിക്കും കാമ്രിയുടെ മത്സരം. പുതിയ കാമ്രി ഓഡി എ4, മെഴ്‌സിഡസ് സി-ക്ലാസ്, ബിഎംഡബ്ല്യു 3 സീരീസ് ഗ്രാൻ ലിമോസിൻ തുടങ്ങിയ മോഡലുകൾക്ക് ബദലായി പ്രവർത്തിക്കും.
അളവുകളുടെ കാര്യത്തിൽ, പുതിയ കാമ്രിക്ക് 4920 എംഎം നീളവും 1840 എംഎം വീതിയും 1455 എംഎം ഉയരവും 500 ലിറ്റർ ബൂട്ട് സ്പേസും 2825 എംഎം വീൽബേസും ആണുള്ളത്. 18 ഇഞ്ച് അലോയ് വീലുകളുള്ള ഗ്രേ, ബ്ലാക്ക്, ഡാർക്ക് ബ്ലൂ, റെഡ്, വൈറ്റ്, സിൽവർ എന്നീ നിറങ്ങളിൽ കാമ്രി വാഗ്ദാനം ചെയ്യുന്നു. സൂപ്പർബിന് 4,869 എംഎം നീളവും 1,864 എംഎം വീതിയും 1,503 എംഎം ഉയരവും 625 ലിറ്റർ ബൂട്ട് സ്പേസും 2,836 എംഎം വീൽബേസും ഉണ്ട്. റോസ്സോ ബ്രൂനെല്ലോ, വാട്ടർ വേൾഡ് ഗ്രീൻ, 18 ഇഞ്ച് അലോയ് വീലുകളുള്ള മാജിക് ബ്ലാക്ക് എന്നീ മൂന്ന് കളർ ഓപ്ഷനുകളിലാണ് സൂപ്പർബ് വാഗ്ദാനം ചെയ്യുന്നത്.
സ്കോഡ സൂപ്പർബിനേക്കാൾ 51 എംഎം നീളം കൂടുതലാണ് ടൊയോട്ട കാമ്രിക്ക്. അതേസമയം സ്കോഡ സൂപ്പർബിന് 24 എംഎം വീതിയും, 48 എംഎം ഉയരവും, 11 എംഎം നീളമുള്ള വീൽബേസും ഉണ്ട്. ബൂട്ട് സ്പേസിൻ്റെ കാര്യം നോക്കുകയാണെങ്കിൽ കാമ്രിയുടെ 500 ലിറ്ററുമായി താരതമ്യപ്പെടുത്തുമ്പോൾ സൂപ്പർബ് 625 ലിറ്റർ ആണ് വാഗ്ദാനം ചെയ്യുന്നത്. വാങ്ങുന്നവർക്ക് കൂടുതൽ ചോയ്‌സുകൾ നൽകിക്കൊണ്ട് സൂപ്പർബിനേക്കാൾ കൂടുതൽ കളർ ഓപ്‌ഷനുകളും കാമ്രി വാഗ്ദാനം ചെയ്യുന്നുണ്ട്.
ഫീച്ചറുകളുടെ കാര്യത്തിൽ സൂപ്പർബിന് 9 ഇഞ്ച് കൊളംബസ് ഇൻഫോടെയ്ൻമെൻ്റ് സിസ്റ്റം, പവേർഡ് ആൻഡ് വെൻ്റിലേറ്റഡ് ഫ്രണ്ട് സീറ്റുകൾ, ഡ്രൈവർ സീറ്റിനുള്ള മസാജ് ഫംഗ്ഷൻ, ലെതറിൽ പൊതിഞ്ഞ ഗിയർ നോബ്, ത്രീ സോൺ ക്ലൈമറ്റ് കൺട്രോൾ, ഡിജിറ്റൽ ഇൻസ്ട്രുമെൻ്റ് ക്ലസ്റ്റർ, 12 സ്പീക്കർ കാൻ്റൺ ഓഡിയോ സിസ്റ്റം എന്നിവ ലഭിക്കുന്നു. കൂടാതെ പിൻ വിൻഡോകൾക്കും വിൻഡ്‌സ്‌ക്രീനുമുള്ള റോൾ-അപ്പ് സൺ വിസറുകൾ, ഡൈനാമിക് ഷാസിസ് കൺട്രോൾ ടെക്, ആക്റ്റീവ് ടയർ പ്രഷർ മോണിറ്ററിങ് സിസ്റ്റം, ഒമ്പത് എയർബാഗുകളും ലഭിക്കുന്നു.
അകത്തേക്കു നോക്കുമ്പോൾ പുതിയ ഇൻ്റീരിയർ ലേഔട്ട് ഫീച്ചർ ചെയ്യുന്ന കാമ്രിക്ക് 12.0 ഇഞ്ച് ഡിജിറ്റൽ ഇൻസ്ട്രുമെൻ്റ് ക്ലസ്റ്റർ, ഫ്ലോട്ടിംഗ് 12.3 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെൻ്റ് സിസ്റ്റം, 9 സ്പീക്കർ JBL ഓഡിയോ സിസ്റ്റം, വെൻ്റിലേറ്റഡ് സീറ്റുകൾ, 360 ഡിഗ്രി ക്യാമറ, വയർലെസ് ആപ്പിൾ കാർപ്ലേ /ആൻഡ്രോയിഡ് ഓട്ടോ എന്നിവ ലഭിക്കുന്നു. HUD ഡിസ്‌പ്ലേ, ത്രീ സോൺ ക്ലൈമറ്റ് കൺട്രോൾ, ഇലക്ട്രിക് സൺറൂഫ് എന്നിവയും ഇതോടൊപ്പം ഉണ്ടാകും. റിക്ലൈനിംഗ്, വെൻ്റിലേഷൻ ഫംഗ്‌ഷനുകൾ, റിയർ സെൻ്റർ കൺസോളിലെ കൺട്രോളുകൾ എന്നിവയും പിൻ സീറ്റിലുണ്ട്.
സുരക്ഷ നോക്കുകയാണെങ്കിൽ കാൽനടക്കാരെ കണ്ടെത്തുന്നതിനുള്ള പ്രീ-കൊളിഷൻ അസിസ്റ്റ്, അഡാപ്റ്റീവ് ക്രൂയിസ് കൺട്രോൾ, ലെയ്ൻ കീപ്പ് അസിസ്റ്റ്, റോഡ് സൈൻ റെക്കഗ്നിഷൻ, ഓട്ടോമാറ്റിക് ഹൈ ബീം എന്നിവയും അതിലേറെയും പോലുള്ള സവിശേഷതകളുള്ള ടൊയോട്ടയുടെ സേഫ്റ്റി സെൻസ് 3.0 അഡാസ് സ്യൂട്ട് ഇതിന് ലഭിക്കുന്നു. 9 എയർബാഗുകൾ, മുന്നിലും പിന്നിലും പാർക്കിംഗ് സെൻസറുകൾ, 360 ഡിഗ്രി ക്യാമറ എന്നിവയാണ് മറ്റ് സുരക്ഷാഫീച്ചറുകൾ.
കൂടുതൽ നൂതന സാങ്കേതികവിദ്യയും കണക്റ്റിവിറ്റിയും സുരക്ഷാ ഫീച്ചറുകളും ടൊയോട്ട കാമ്രി വാഗ്ദാനം ചെയ്യുന്നു. അതേസമയം മസാജ് ഫംഗ്‌ഷനും വലിയ ഓഡിയോ സിസ്റ്റവും പോലുള്ള മികച്ച സവിശേഷതകളോടെ. സ്കോഡ സൂപ്പർബ് ആഡംബരത്തിലും സുഖസൗകര്യങ്ങളിലും ശ്രദ്ധ കേന്ദ്രീകരിക്കുന്നു.
190 എച്ച്പി പവറും 320 എൻഎം ടോർക്കും പുറപ്പെടുവിക്കുന്ന അതേ 2.0 ലിറ്റർ, 4 സിലിണ്ടർ, TSI ടർബോ പെട്രോൾ മോട്ടോറായിരിക്കും സൂപ്പർബിന് കരുത്ത് പകരുക. മുൻ ചക്രങ്ങളിലേക്ക് പവർ അയയ്ക്കുന്ന 7-സ്പീഡ് DSG ഗിയർബോക്സുമായാണ് ഇത് ജോടിയാക്കിയിരിക്കുന്നത്. കോഡിയാക്, VW ടിഗ്വാൻ, ഇന്ത്യയിലെ നിരവധി ഔഡി മോഡലുകളിലും ഈ എഞ്ചിനാണ് ഉള്ളത്. ടൊയോട്ടയുടെ അഞ്ചാം തലമുറ ഹൈബ്രിഡ് സിസ്റ്റവുമായി ജോടിയാക്കിയ 2.5 ലിറ്റർ പെട്രോൾ എഞ്ചിനാണ് പുതിയ കാമ്രിക്ക് കരുത്തേകുന്നത്. THS 5 എന്ന് വിളിക്കപ്പെടുന്ന പുതിയ മോഡൽ 230 എച്ച്പി പവർ പുറപ്പെടുവിക്കുന്നു, കൂടാതെ 25 kmpl ഇന്ധനക്ഷമതയും അവകാശപ്പെടുന്നു. എഞ്ചിൻ ഇ-സിവിടി ഗിയർബോക്സുമായാണ് ജോടിയാക്കിയിരിക്കുന്നത്.
വിലയും വേരിയൻ്റും താരതമ്യം ചെയ്യുമ്പോൾ കാമ്രിയും സൂപ്പർബും സിംഗിൾ ഫുള്ളി ലോഡ്ഡ് വേരിയൻ്റുകളിലാണ് വാഗ്ദാനം ചെയുന്നത്. കംപ്ലീറ്റ്‌ലി നോക്ക്ഡ് ഡൗൺ ആയാണ് കാമ്രി ഇന്ത്യയിലെത്തുന്നത്. 48 ലക്ഷം രൂപയാണ് ഇതിന്റെ എക്സ് ഷോറൂം വില. 46.17 ലക്ഷം രൂപ എക്സ് ഷോറൂം ലഭ്യമായിരുന്ന മുൻഗാമിയേക്കാൾ 1.83 ലക്ഷം രൂപ കൂടുതലാണ് പുതിയ കാമ്രിയുടെ വില. മറുവശത്ത്, സൂപ്പർബ് ഇന്ത്യയിൽ കംപ്ലീറ്റ്‌ലി ബിൽഡ് യൂണിറ്റ് ആയാണ് വരുന്നത്. 54 ലക്ഷം രൂപയാണ് സൂപ്പർബിന്റെ എക്സ്-ഷോറൂം വില. മുൻ ടോപ്പ്-സ്പെക്ക് സൂപ്പർബിനേക്കാൾ 16.7 ലക്ഷം രൂപ കൂടുതലാണ് സെഡാൻ്റെ വില.
ഇന്ധനക്ഷമതയ്ക്കാണ് നിങ്ങൾ മുൻഗണന നൽകുന്നതെങ്കിൽ കാമ്രിയാണ് നല്ല ചോയ്‌സ്. ശക്തമായ ടോർക്കും കൂടുതൽ ചലനാത്മക ഡ്രൈവിംഗ് അനുഭവവും തിരഞ്ഞെടുക്കുകയാണെങ്കിൽ സൂപ്പർബ് തിരഞ്ഞെടുക്കാവുന്നതാണ്.
