ബോളിവുഡ് താരങ്ങളായ മലൈക അറോറയും അര്‍ജുന്‍ കപൂറും വേര്‍പിരിഞ്ഞുവെന്ന വാര്‍ത്തകളാണ് ബോളിവുഡില്‍ നിലവില്‍ ഹോട്ട് ടോപിക് ആയി മാറിയിരിക്കുന്നത്. ഇരുവരും സുഹൃത്തുക്കളായി തുടരാനാണ് തീരുമാനിച്ചിരിക്കുന്നത് എന്ന് പിങ്ക്‌വില്ല റിപ്പോര്‍ട്ട് ചെയ്തിരുന്നു. ഇപ്പോഴിതാ, നിഗൂഢമായ പോസ്റ്റുകളാണ് ഇരുതാരങ്ങളും പങ്കുവച്ചിരിക്കുന്നത്.
”നമുക്ക് ജീവിതത്തില്‍ രണ്ട് ചോയ്‌സുകളുണ്ട്. ഭൂതകാലത്തിന്റെ തടവുകാരോ ഭാവി സാധ്യതകള്‍ അന്വേഷിക്കുന്നവരോ ആകാം” എന്നാണ് അര്‍ജുന്‍ കപൂര്‍ ഇന്‍സ്റ്റഗ്രാം സ്റ്റോറിയില്‍ കുറിച്ചിരിക്കുന്നത്. താരങ്ങള്‍ വേര്‍പിരിയില്ലെന്ന് മലൈകയുടെ മാനേജര്‍ വെളിപ്പെടുത്തിയതിന് ഒരു ദിവസത്തിന് ശേഷമാണ് അര്‍ജുന്റെ പോസ്റ്റ് എത്തിയിരിക്കുന്നത്.
നേരത്തെ, മലൈകയും ഇന്‍സ്റ്റാഗ്രാമില്‍ പോസ്റ്റ് പങ്കുവച്ചിരുന്നു. ”നമ്മെ സ്‌നേഹിക്കുകയും പിന്തുണയ്ക്കുകയും ചെയ്യുന്ന ആളുകളാണ് ഭൂമിയിലെ ഏറ്റവും വലിയ നിധി. അവ വാങ്ങാനോ മാറ്റിസ്ഥാപിക്കാനോ കഴിയില്ല, നമുക്കോരോരുത്തര്‍ക്കും അവയില്‍ ചിലത് മാത്രമേയുള്ളൂ” എന്നായിരുന്നു മലൈകയുടെ പോസ്റ്റ്.
അതേസമയം, 2018ല്‍ ഒരു ഫാഷന്‍ ഷോയിലാണ് ഇരുവരും ആദ്യമായി ഒന്നിച്ചെത്തിയത്. 2019ല്‍ ആയിരുന്നു തങ്ങള്‍ പ്രണയത്തിലാണെന്ന് മലൈകയും അര്‍ജുനും വ്യക്തമാക്കിയത്. ഇതോടെ ഇരുവരുടെയും പ്രായവ്യത്യാസം ചര്‍ച്ചകളില്‍ നിറഞ്ഞിരുന്നു. അര്‍ജുനേക്കാള്‍ 12 വയസ് കൂടുതലാണ് മലൈകയ്ക്ക്. പ്രായവ്യത്യാസം എന്നും വിമര്‍ശനങ്ങളിലും ട്രോളുകളിലും നിറഞ്ഞിരുന്നു.
