നടി രാധിക എന്നാല്‍ മലയാളി പ്രേക്ഷകര്‍ക്ക് ‘ക്ലാസ്‌മേറ്റ്‌സ്’ സിനിമയിലെ റസിയ ആണ്. ഒരിടവേളയ്ക്ക് ശേഷം വീണ്ടും സിനിമയിലേക്ക് തിരിച്ചു വരികയാണ് രാധിക. മഞ്ജു വാര്യര്‍ ചിത്രം ‘ആയിഷ’യില്‍ ഒരു പ്രധാന കഥാപാത്രമായാണ് രാധിക വീണ്ടും സിനിമയില്‍ സജീവമാകാന്‍ ഒരുങ്ങുന്നത്.

ഇതിനിടെ ഷൂട്ടിംഗ് ലൊക്കേഷനുകളില്‍ വച്ച് അനുഭവിച്ച ബുദ്ധിമുട്ടുകളെ കുറിച്ചാണ് രാധിക പറയുന്നത്. ക്ലാസ്‌മേറ്റ്‌സിന്റെ ഷൂട്ടിംഗ് 65 ദിവസത്തോളം ഉണ്ടായിരുന്നു. എല്ലാവരും ഒരേ വൈബിലുള്ള ആള്‍ക്കാരയതിനാല്‍ ഓരോ ദിവസവും രസകരമായ ഓര്‍മ്മകളാണ് സമ്മാനിച്ചത്. ഒരു ദിവസം ഷൂട്ടിംഗ് തുടങ്ങുമ്പോഴേക്കും തനിക്ക് നല്ല പനി.

താനത് ആരോടും പറഞ്ഞില്ല. ലൈബ്രറി സീക്വന്‍സാണ് ചിത്രീകരിച്ചു കൊണ്ടിരുന്നത്. താനും നരേനുമായിരുന്നു സീനില്‍. പെട്ടെന്ന് താന്‍ തലകറങ്ങി വീണു. തന്നെയും എടുത്ത് എല്ലാവരും കൂടി ആശുപത്രിയിലേക്ക് ഓടി. മൂന്ന് ദിവസം വിശ്രമിച്ച് പനി മാറിയ ശേഷമാണ് സെറ്റിലേക്ക് തിരിച്ചു വന്നത് എന്നാണ് രാധിക പറയുന്നത്.

‘ഇന്‍ ഗോസ്റ്റ് ഹൗസ് ഇന്‍’ എന്ന ചിത്രത്തിന്റെ ഷൂട്ടിംഗിനിടെ ഉണ്ടായ ബുദ്ധിമുട്ടുകളെ കുറിച്ചും താരം പറയുന്നുണ്ട്. ഗോസ്റ്റ് ഹൗസ് ചെയ്തു കൊണ്ടിരുന്ന സമയത്ത് ഇടിയും തൊഴിയുമൊക്കെ കൊള്ളാന്‍ തനിക്കൊരു ഡ്യൂപ്പിനെ കൊണ്ടു വന്നിരുന്നു. എന്നാല്‍ ക്യാമറ ചെയ്തിരുന്ന വേണു ചേട്ടന്‍ ‘ഡ്യൂപ്പിനെ വച്ച് ചെയ്യേണ്ട, കുഞ്ഞ് തന്നെ ചെയ്തോളും’ എന്ന് പറഞ്ഞു.

അതിന്റെ റിസ്‌ക് ഫാക്ടേഴ്സ് ഒന്നും അപ്പോള്‍ അറിയില്ലായിരുന്നു. ചെറിയ ഇടിയും തൊഴിയും വീഴ്ചയുമൊക്കെയായിരുന്നു. ആറ് ദിവസം ആയപ്പോള്‍ നടക്കാന്‍ പറ്റാതായി. ശരീരം മുഴുവന്‍ നീരുവച്ചു. ഇത് കണ്ടതോടെ വീട്ടില്‍ പോയി നാലു ദിവസം വിശ്രമിച്ച് വരാന്‍ സംവിധായകന്‍ ലാല്‍ സാര്‍ പറഞ്ഞു. പിന്നീട് ഒരഴ്ചയ്ക്ക് ശേഷമാണ് താന്‍ സെറ്റിലെത്തിയത് എന്നാണ് രാധിക ഒരു അഭിമുഖത്തില്‍ പറയുന്നത്.