അമിത വേഗത്തില്‍ ഓവര്‍ടേക്ക് ചെയ്ത് എതിര്‍ വശത്തേക്ക് വന്ന് ഗതാഗത തടസം സൃഷ്ടിച്ച സൗകാര്യ ബസിന്റെ വീഡിയോയുമായി നടന്‍ ആന്റണി വര്‍ഗീസ്. നമ്മുടെ നാട്ടിലെ വണ്ടിക്കാരുടെ പരിപാടി ഇങ്ങനെയാണ് എന്നും ആന്റണി വര്‍ഗീസ് പങ്കുവച്ച വീഡിയോയില്‍ പറയുന്നു.
എറണാകുളം സര്‍ക്കാര്‍ ആശുപത്രിയുടെ മുന്നില്‍ വച്ചാണ് സംഭവം. ”ഓവര്‍ സ്പീഡില്‍ റോങ് സൈഡ് കയറിവന്ന് അവിടെ മൊത്തം ബ്ലോക്ക് ആക്കിയത് ഈ ബസ് ആണ്. അതും എറണാകുളം ഗവണ്മെന്റ ജനറല്‍ ഹോസ്പിറ്റലിന്റെ മുന്നില്‍.”
”എത്ര രോഗികള്‍ ദിവസവും വരുന്ന സ്ഥലമാണ്” എന്ന കുറിപ്പോടെയാണ് വീഡിയോ ഫെയ്‌സ്ബുക്കില്‍ പങ്കുവച്ചിരിക്കുന്നത്. താരത്തെ പിന്തുണച്ചും വിമര്‍ശിച്ചും കൊണ്ടുള്ള കമന്റുകളാണ് വീഡിയോക്ക് ലഭിക്കുന്നത്. നടന്‍ ജിനോ ജോസഫ് അടക്കമുള്ളവര്‍ താരത്തെ പിന്തുണച്ച് എത്തിയിട്ടുണ്ട്.
”ബസില്‍ കേറാറുണ്ട് ഇപ്പോഴും കേറും. എന്നുവച്ച് ഒരാള്‍ റോങ്‌സൈഡ് കയറി വന്നു വഴി തടസപ്പെടുത്തുമ്പോള്‍ പിന്നെ മറ്റു വണ്ടികള്‍ എങ്ങനെ പോകും. റോഡ് ആരുടേയും തറവാട്ടുസ്വത്തല്ല അത് പ്രൈവറ്റ് ബസ് ആയാലും കെഎസ്ആര്‍ടിസിയായാലും.”
”റോഡില്‍ കൂടെ വാഹനം ഓടിക്കുമ്പോള്‍ എതിരെ വരുന്ന ഏതു വണ്ടിയോടും ഒരു പരസ്പര ബഹുമാനം ഉണ്ടാവണം. ഇങ്ങനെ റോങ്ങ് കേറി വരുന്ന സമയം ഒരു ആംബുലന്‍സ് കടന്നു വന്നാല്‍ ഉള്ള അവസ്ഥ എന്താകും” എന്നിങ്ങനെയാണ് ചില കമന്റുകള്‍.
