‘പാല്‍തു ജാന്‍വര്‍’ സിനിമ ചെയ്തപ്പോള്‍ മൃഗങ്ങളോടുള്ള തന്റെ പേടിയെ കുറിച്ച് ബേസില്‍ ജോസഫ് തുറന്നു പറഞ്ഞിരുന്നു. പൂച്ച അടുത്തേക്ക് വരുമ്പോള്‍ സോഫയില്‍ നിന്നും ഞെട്ടി എഴുന്നേല്‍ക്കുന്ന ബേസിലിന്റെ വീഡിയോയും ശ്രദ്ധ നേടിയിരുന്നു. ബേസിലിന്റെ ഭാര്യ എലിസബത്ത് ആയിരുന്നു വീഡിയോ പങ്കുവച്ചത്.
തനിക്ക് മൃഗങ്ങളോടുള്ള പേടി വീണ്ടും തുറന്നു പറഞ്ഞിരിക്കുകയാണ് ബേസില്‍. ‘പൂച്ചയെ പേടിച്ച് ഞെട്ടുന്ന വീഡിയോ കണ്ടല്ലോ?’ എന്ന ചോദ്യത്തോടാണ് താരം പ്രതികരിച്ചത്. എലിയുടെ ആന്റിയുടെ വീട്ടിലെ പൂച്ചയാണത്. പാച്ചു. പണ്ടു മുതലേ മൃഗങ്ങളെ പേടിയാണ്.
റോഡിലൂടെ പോകുമ്പോള്‍ പട്ടിയെ കണ്ടാല്‍ മുട്ടിടിക്കും. ആദ്യം സംവിധാനം ചെയ്ത ‘പ്രിയംവദ കാതരയാണോ’ എന്ന ഷോര്‍ട്ട് ഫിലിമിലെ പ്രധാന കഥാപാത്രം പട്ടിയാണ്. ഷോട്ട് എടുത്ത് കഴിഞ്ഞപ്പോള്‍ പട്ടി അതാ നിലത്തു തനിച്ച്. പിന്നെ നോക്കുമ്പോള്‍ താന്‍ ഡൈനിംഗ് ടേബിളിന്റെ മുകളിലാ എന്നാണ് ബേസില്‍ പറയുന്നത്.
അതേസമയം, ‘മിന്നല്‍ മുരളി’ എന്ന ചിത്രത്തിന് ഏഷ്യന്‍ അക്കാദമി അവാര്‍ഡ്‌സില്‍ മികച്ച സംവിധായകനുള്ള പുരസ്‌കാരം നേടിയിരിക്കുകയാണ് ബേസില്‍. ‘ജയ ജയ ജയ ജയഹേ’ ആണ് ബേസിലിന്റെതായി ഒടുവില്‍ തിയേറ്ററുകളിലെത്തിയ സിനിമ. ചിത്രത്തിലെ താരത്തിന്റെ കഥാപാത്രം ഏറെ ശ്രദ്ധിക്കപ്പെട്ടിരുന്നു.
Read more
‘അജയന്റെ രണ്ടാം മോഷണം’, ‘കപ്’, ‘കഠിന കഠോരമീ അണ്ടകടാഹം’ എന്നീ സിനിമകളിലാണ് ഇനി ബേസില്‍ അഭിനയിക്കാന്‍ ഒരുങ്ങുന്നത്. ഇതിനൊപ്പം മിന്നല്‍ മുരളിയുടെ രണ്ടാം ഭാഗം ഒരുക്കാനും താരം തയാറെടുക്കുന്നുണ്ട്. കമ്മിറ്റ് ചെയ്ത സിനിമകള്‍ എല്ലാം തീര്‍ത്ത് അടുത്ത വര്‍ഷം മിന്നല്‍ മുരളി 2 ആരംഭിക്കും എന്നാണ് ബേസില്‍ പറയുന്നത്.
