വിവാഹശേഷം സിനിമ വിട്ട അഭിനേത്രിയാണ് സംയുക്ത വര്‍മ. സംയുക്ത വീണ്ടും അഭിനയിക്കാനെത്തുമോ എന്ന ചോദ്യം ആരാധകര്‍ പലപ്പോഴായി ചോദിക്കാറുള്ളതാണ്. സിനിമകളിലൂടെ ജീവിതത്തിന്റെ തന്നെ ഭാഗമായ സംയുക്തയ്‌ക്കൊപ്പം ബിജു മേനോന്‍ ഒരു സിനിമ ചെയ്യുമോ എന്നും ആരാധകര്‍ ചോദിക്കുന്നുണ്ട്. അതിനെ കുറിച്ച് പ്രതികരിച്ചിരിക്കുകയാണ് ബിജു മേനോന്‍. സംയുക്തയുമായി ഒരുമിച്ച് അഭിനയിക്കാമെങ്കിലു ഒരു കുഴപ്പമുണ്ടെന്നാണ് ബിജു മേനോന്‍ പറയുന്നത്.
“സംയുക്തയ്‌ക്കൊപ്പം അഭിനയിക്കുന്നതില്‍ കുഴപ്പമൊന്നുമില്ല. അത് സംഭവിക്കുമോ ഇല്ലയോ എന്നും പറയാനാവില്ല. പക്ഷേ, ഞങ്ങള്‍ ഇനി ഒരുമിച്ച് അഭിനയിക്കേണ്ടി വന്നാലുള്ള പ്രശ്‌നം, മുഖത്തു നോക്കിയാല്‍ രണ്ടുപേരും ചിരിച്ചു പോകുമെന്നതാണ്. അടുത്ത കാലത്തു ഞങ്ങള്‍ അഭിനയിച്ച പരസ്യത്തിലും ഇതേ പ്രശ്‌നമുണ്ടായിരുന്നു. കല്യാണം ഉറപ്പിച്ചിരുന്ന സമയത്തായിരുന്നു മേഘമല്‍ഹാറിന്റെ ഷൂട്ടിങ്. അന്നു തന്നെ ചിരി അടക്കി അഭിനയിക്കാന്‍ ഞങ്ങള്‍ പാടുപെട്ടു.”
Read more
“സംയുക്ത ഇനി അഭിനയിക്കേണ്ട എന്ന നിലപാടൊന്നുമില്ല. അതൊക്കെ അവരുടെ കൂടി താല്‍പര്യമാണ്. പിന്നെ മകന് ഏറെ ശ്രദ്ധ വേണ്ട പ്രായമായതിനാല്‍ രണ്ടുപേരും കൂടി സിനിമയിലായാല്‍ ബുദ്ധിമുട്ടാവും എന്നതു കൊണ്ട് അഭിനയം ഒഴിവാക്കിയതാണ്. കാഴ്ച, കഥ പറയുമ്പോള്‍… തുടങ്ങിയ സിനിമകളിലേക്കു സംയുക്തയെ വിളിച്ചിരുന്നു. പക്ഷേ, വിവാഹശേഷം ഞങ്ങള്‍ ഒരുമിച്ചൊരു സിനിമയ്ക്കുള്ള “ഫാമിലി പാക്കേജ്” വിളി ഇതുവരെ വന്നിട്ടില്ല.” മനോരമയുമായുള്ള അഭിമുഖത്തില്‍ ബിജു മേനോന്‍ പറഞ്ഞു.
