താന്‍ രോഗബാധിതനാണെന്നും ചികിത്സയിലാണെന്നും കന്നട സൂപ്പര്‍ താരം ശിവ രാജ്കുമാര്‍. എന്നാല്‍ എന്താണ് രോഗം എന്നതിനെ കുറിച്ച് കാര്യമായ വിവരങ്ങളൊന്നും താരം പങ്കുവച്ചിട്ടില്ല. ഒരു യൂട്യൂബ് ചാനലിന് നല്‍കിയ അഭിമുഖത്തിലാണ് ശിവ രാജ്കുമാര്‍ ഇക്കാര്യങ്ങള്‍ വെളിപ്പെടുത്തിയത്.
”ഞാനും ഒരു മനുഷ്യനാണ്, എനിക്ക് ഒരു പ്രശ്നമുണ്ട്. അതിന് വേണ്ടിയുള്ള ചികിത്സ നടക്കുകയാണ്. നാല് തവണ കൂടി ചികിത്സ നടത്തേണ്ടതുണ്ട്. രണ്ട് സെഷനുകള്‍ക്ക് ശേഷം ഒരു ശസ്ത്രക്രിയ ആവശ്യമാണ്. അത് യുഎസില്‍ ആയിരിക്കും. അത് കഴിഞ്ഞ് ഭേദമാവാന്‍ ഒരു മാസം വേണ്ടിവരും.”
”അതിന് ശേഷം ഞാന്‍ പൂര്‍ണ ആരോഗ്യവാനായിരിക്കും. ചികിത്സ നടക്കുന്നുണ്ടെങ്കിലും ജോലി തുടരുകയാണ്. 45 എന്ന വരാനിരിക്കുന്ന സിനിമയുടെ ചിത്രീകരണം നടന്നു കൊണ്ടിരിക്കുകയാണ്” എന്നാണ് ശിവ രാജ്കുമാര്‍ ‘ഭായ്രതി രണഗല്‍’ എന്ന പുതിയ ചിത്രത്തിന്റെ പ്രമോഷനിടെ നല്‍കിയ അഭിമുഖത്തില്‍ പറഞ്ഞിരിക്കുന്നത്.
അതേസമയം, മുഫ്തി എന്ന ഹിറ്റ് ചിത്രത്തിന്റെ പ്രീക്വല്‍ ആണ് ഭായ്രതി രണഗല്‍. നാര്‍ഥന്‍ സംവിധാനം ചെയ്യുന്ന ചിത്രത്തില്‍ രുക്മിണി വസന്ത്, രാഹുല്‍ ബോസ്, ദേവരാജ്, അവിനാഷ് തുടങ്ങിയ താരങ്ങളും വേഷമിടുന്നുണ്ട്. നവംബര്‍ 15ന് ആണ് ചിത്രം റിലീസ് ചെയ്യുന്നത്.
