ആളുകള്‍ക്ക് മടുത്താല്‍ അഭിനയം നിര്‍ത്തുകയാണ് നല്ലതെന്ന് നടി മഞ്ജു വാര്യര്‍. ‘തുനിവി’ന്റെ പ്രൊമോഷന്‍ പരിപാടികള്‍ക്കിടെയാണ് മഞ്ജു വാര്യര്‍ ഇക്കാര്യം പറഞ്ഞത്. അങ്ങനെ അഭിനയം നിര്‍ത്തേണ്ടിവന്നാല്‍ ഒരുപക്ഷെ, സിനിമയില്‍ കൊറിയോഗ്രാഫറായി വന്നേക്കുമെന്നും നടി പറഞ്ഞു.
അഭിനയത്തെ കുറിച്ച് പറഞ്ഞാല്‍, ഞാന്‍ എന്തായാലും അഭിനയം നിര്‍ത്താന്‍ ഉദ്ദേശിച്ചിട്ടില്ല. എന്നാല്‍ പ്രേക്ഷകര്‍ക്ക് നമ്മുടെ അഭിനയം മടുത്ത് തുടങ്ങുമ്പോള്‍ നിര്‍ത്തുന്നതാണ് നല്ലത്. ഒരു പക്ഷെ ഭാവിയില്‍ ഞാനൊരു കൊറിയോഗ്രാഫറായി സിനിമയിലേക്ക് വരുമായിരിക്കും.
ട്രോളുകള്‍ ഞാന്‍ ശരിക്കും ആസ്വദിക്കാറുണ്ട്. അവരുടെ ക്രിയേറ്റിവിറ്റിയെ നമ്മള്‍ അഭിനന്ദിക്കുക തന്നെ വേണം. അടുത്ത പ്രാവശ്യം വീണ്ടും അതേ തെറ്റുകള്‍ സംഭവിക്കാതിരിക്കാന്‍ ട്രോളുകള്‍ ഓര്‍മപ്പെടുത്തും. എന്നാല്‍ മറ്റുള്ളവരെ വേദനിപ്പിക്കാന്‍ വേണ്ടിയായിരിക്കരുത് ഇവ ഉപയോഗിക്കുന്നതെന്നും മഞ്ജു വാര്യര്‍ പറഞ്ഞു.
Read more
‘അസുരന്‍’ എന്ന ചിത്രത്തിന് ശേഷം മഞ്ജു അഭിനയിക്കുന്ന രണ്ടാമത്തെ തമിഴ് ചിത്രമാണ് തുനിവ്. അജിത്ത് ചിത്രം ‘തുനിവി’ന്റെ ട്രെയ്ലര്‍ എത്തിയപ്പോള്‍ മുതല്‍ മഞ്ജു വാര്യരുടെ പ്രകടനം ശ്രദ്ധ നേടിയിരുന്നു. ആക്ഷന്‍ പശ്ചാത്തലത്തിലുള്ള സിനിമയില്‍ സുപ്രധാന വേഷമാണ് മഞ്ജുവിന് ലഭിച്ചിരിക്കുന്നത്.
