താന്‍ സിനിമാരംഗത്ത് എത്തിയതിന് ഏറ്റവും കൂടുതല്‍ അഭിമാനവും സന്തോഷവുമുള്ളത് തന്റെ ഉമ്മയ്ക്ക് ആയിരിക്കുമെന്ന് നടന്‍ ലുക്മാന്‍ അവറാന്‍. തന്റെ സിനിമാസ്വപ്നം ഉമ്മയോട് അല്ലാതെ മറ്റാരോടും പറഞ്ഞിട്ടില്ലായിരുന്നുവെന്നും നടന്‍ പറയുന്നു. ഓരോ തവണയും തന്നെ വിട്ട് സിനിമയിലെ അവസരങ്ങള്‍ പോകുമ്പോള്‍ അടുത്തത് നോക്ക് അല്ലെങ്കില്‍ ഗള്‍ഫിലേക്ക് പോകാന്‍ ഉമ്മ പറഞ്ഞിരുന്നുവെന്നും ലുക്മാന്‍ പറഞ്ഞു. റെഡ് എഫ്എമ്മിന് നല്‍കിയ അഭിമുഖത്തിലാണ് നടന്‍ ഇക്കാര്യങ്ങള്‍ പറഞ്ഞത്.
‘സിനിമാ സ്വപ്നം എന്ന കാര്യം ആകെ ഞാന്‍ ഉമ്മയോട് മാത്രമാണ് പറഞ്ഞിരുന്നത്. വീട്ടില്‍ വേറെയാരോടും അങ്ങനെ ഒന്നും പറഞ്ഞിരുന്നില്ല. എന്‍ജിനിയറിങ് കഴിഞ്ഞ് ട്രെയിനിയായി ജോലി ചെയ്യുന്ന ശമ്പളമാണ് വീട്ടില്‍ തരുന്നതെന്നാണ് പറഞ്ഞിരുന്നത്. ചില മാസങ്ങളില്‍ വീട്ടിലേക്ക് പണം അയക്കാന്‍ പറ്റില്ല. അപ്പോള്‍ ഉമ്മ തന്റെ സ്വര്‍ണ്ണം വല്ലതും പണയം വെച്ച് അത് കൊടുക്കും.പിന്നീട് തന്നാല്‍ മതിയെന്നും പറയും.
ഉമ്മ ആദ്യമായി തിയറ്ററില്‍ വന്ന് ഉണ്ടയും തല്ലുമാലയും ഓപ്പറേഷന്‍ ജാവയും കണ്ടു. ഉമ്മക്ക് വലിയ സന്തോഷമായി. ഞാനൊക്കെ എത്ര വേദനിച്ചിട്ടുണ്ടെന്ന് അറിയോന്ന് ചോദിക്കും. എന്റെ സിനിമാ വരവില്‍ ഏറ്റവും കൂടുതല്‍ സന്തോഷിക്കുന്നത് എന്റെ ഉമ്മയായിരിക്കും’, ലുക്മാന്‍ പറഞ്ഞു.
അഷ്റഫ് ഹംസ രചനയും സംവിധാനവും നിര്‍വഹിക്കുന്ന ചിത്രം ‘സുലൈഖ മന്‍സില്‍’ ആണ് ലുക്മാന്‍ നായകനായി എത്തുന്ന അടുത്ത ചിത്രം. ചെമ്പന്‍ വിനോദ് ജോസ്, അനാര്‍ക്കലി മരക്കാര്‍ എന്നിവര്‍ കേന്ദ്രകഥാപാത്രങ്ങളെ അവതരിപ്പിക്കുന്ന ചിത്രത്തില്‍ ഗണപതി, ശബരീഷ് വര്‍മ്മ, മാമുക്കോയ, ജോളി ചിറയത്ത്, അമല്‍ഡ ലിസ്, ദീപ തോമസ്, അദ്രി ജോ, അര്‍ച്ചന പദ്മിനി, നിര്‍മ്മല്‍ പാലാഴി തുടങ്ങിയവര്‍ മറ്റു പ്രധാന കഥാപാത്രങ്ങളെ അവതരിപ്പിക്കുന്നു.
Read more
ചെമ്പോസ്‌കി മോഷന്‍ പിക്ചേഴ്സിന്റെ ബാന്നറില്‍ ചെമ്പന്‍ വിനോദ് ജോസ്, സുബീഷ് കണ്ണഞ്ചേരി, സമീര്‍ കാരാട്ട് എന്നിവര്‍ നിര്‍മ്മിച്ച ചിത്രം കേരളത്തില്‍ വിതരണത്തിനെത്തിക്കുന്നത് സെഞ്ച്വറി ഫിലിംസാണ്. ഈദിന് ചിത്രം തിയേറ്ററുകളില്‍ എത്തും.
