‘തങ്കലാന്‍’ സിനിമയിലെ തന്റെ കഥാപാത്രത്തെ കുറിച്ച് സംസാരിച്ച് നടി മാളവിക മോഹനന്‍. ആരതി എന്ന കഥാപാത്രമായാണ് ചിത്രത്തില്‍ മാളവിക വേഷമിടുന്നത്. വളരെ വ്യത്യസ്തമായ ലുക്കിലാണ് നടി ചിത്രത്തില്‍ എത്തുന്നത്. നേരത്തെ എത്തിയ മാളവികയുടെ ലുക്കും പോസ്റ്ററുകളുമെല്ലാം ശ്രദ്ധ നേടിയിരുന്നു.
ഓഡിയോ ലോഞ്ച് ചടങ്ങിലാണ് മാളവിക തന്റെ കഥാപാത്രത്തെ കുറിച്ച് സംസാരിച്ചത്. ”തങ്കലാന്‍ എന്റെ ഹൃദയത്തിന്റെ ഒരു ഭാഗമാണ്. മനോഹരമായ ഒരു ടീമിനൊപ്പമായിരുന്നു എന്റെ തങ്കലാന്‍ യാത്ര. അസാധ്യ താരങ്ങള്‍ക്കൊപ്പമുള്ള ഒന്നരവര്‍ഷത്തെ യാത്രയായിരുന്നു ഇത്. ആരതിയെ എനിക്ക് തന്നതിന് രഞ്ജിത് സാറിനോട് നന്ദി പറയുന്നു.”
”അല്‍പ്പം ഇമോഷണലാകാതെ ആരതിയെ കുറിച്ച് പറയാനാകില്ല. ഇത്തരമൊരു കഥാപാത്രം എന്നെ വിശ്വസിച്ച് ഏല്‍പ്പിച്ചതിന് നന്ദി. ഇതു പോലെയൊരു കഥാപാത്രം ഇന്ത്യന്‍ സിനിമയില്‍ ഞാന്‍ കണ്ടിട്ടില്ല. വിക്രം സാര്‍ ഇല്ലായിരുന്നെങ്കില്‍ ഈ കഥാപാത്രം എനിക്ക് ചെയ്യാനാകില്ലായിരുന്നു.”’
”തങ്കലാന്‍ ഒരു ടീം എഫേര്‍ട്ടാണ്. തങ്കലാന്‍ ഒരു തിയറ്റര്‍ എക്‌സിപീരിയന്‍സാണ്. ഞാനും അതിനായി കാത്തിരിക്കുന്നു” എന്നാണ് മാളവിക പറയുന്നത്. അതേസമയം, ഓഗസ്റ്റ് 15ന് ആണ് തങ്കലാന്‍ റിലീസിനെത്തുന്നത്. 150 കോടി ബജറ്റിലാണ് ചിത്രം ഒരുങ്ങുന്നത്. വിക്രത്തിന്റെ വമ്പന്‍ മെയ്‌ക്കോവര്‍ കൊണ്ട് തന്നെ ചര്‍ച്ചയായ ചിത്രമാണ് തങ്കലാന്‍.
കോലാര്‍ സ്വര്‍ണ ഖനി പശ്ചാത്തലമായി അണിയിച്ചൊരുക്കിയ പീരിയോഡിക്കല്‍ ആക്ഷന്‍ ചിത്രമാണ് തങ്കലാന്‍. തമിഴ്, മലയാളം, തെലുങ്ക്, കന്നഡ, ഹിന്ദി ഭാഷകളിലായി തങ്കലാന്‍ തിയേറ്ററുകളിലെത്തും. പാര്‍വതി തിരുവോത്ത് ചിത്രത്തിലൊരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഗംഗമ്മ എന്ന കഥാപാത്രമായാണ് പാര്‍വതി വേഷമിടുന്നത്.
