പള്ളിയോടത്തില്‍ ചെരിപ്പിട്ട് കയറി ഫോട്ടോഷൂട്ട് നടത്തിയതിന് വിവാദത്തിലായ താരമാണ് നിമിഷ ബിജോ. സിനിമകളിലും സീരിയലുകളിലും സജീവമായി മുന്നേറുന്ന നടി താന്‍ സൈബര്‍ ആക്രമണം നേരിടുകയാണെന്ന് പരാതിപ്പെട്ടിരിക്കുകയാണിപ്പോള്‍. ലെസ്ബിയന്‍ ആണോയെന്ന് ചോദിച്ച് പോലും പലരും കമന്റിടാറുണ്ടെന്നും പള്ളിയോട വിഷയം തന്നെയാണ് ഇതിന് പിന്നിലെന്നും അവര്‍ പറയുന്നു.

ചെരുപ്പിട്ട് പള്ളിയോടത്തില്‍ കയറിയതാണ് പ്രശ്നമായത്. അതിന്റെ മഹത്വമെനിക്ക് അറിയില്ലായിരുന്നു. ഫോട്ടോ പുറത്ത് വന്നതോടെ വല്ലാത്ത തെറിവിളികളായിരുന്നു. ഇപ്പോഴും അത് തുടര്‍ന്ന് പോരുകയാണെന്ന് ചാനല്‍ മീഡിയ ലൈഫിന് നല്‍കിയ അഭിമുഖത്തിലൂടെ നിമിഷ പറയുന്നു.

എന്നെ ഞാനാക്കിയത് സോഷ്യല്‍ മീഡിയയാണ്. എന്നാല്‍ ഞാനൊരു ഫോട്ടോ ഇട്ട് കഴിഞ്ഞാല്‍ എന്റെ വീട്ടുകാര്‍ക്കോ ഭര്‍ത്താവിനോ ഇല്ലാത്ത സങ്കടം നിങ്ങള്‍ക്ക് വേണ്ട. തെറിവിളികളൊന്നും അതിന് വേണ്ട എന്നാണ് ഞാന്‍ ഉദ്ദേശിച്ചത്. മോശമായി കമന്റിടുന്നവര്‍ക്കുള്ള മറുപടി അതിന് താഴെ തന്നെ ഞാന്‍ കൊടുക്കാറുണ്ട്. ഒട്ടും പറ്റാത്ത കമന്റുകള്‍ പിന്നെ ഞാനും വിട്ട് കളയുകയാണ് ചെയ്യാറുള്ളത്. അവര്‍ പറയുന്നു.

എനിക്ക് കട്ട സപ്പോര്‍ട്ട് തന്നിരുന്ന ഒരുപാട് പേരുണ്ടായിരുന്നു. എന്നാല്‍ ഞാന്‍ കുറച്ച് മുകളിലേക്ക് മാറിയെന്ന് കണ്ടപ്പോള്‍ അവരെല്ലാം എന്നെ അവഗണിച്ചു. അതെന്താണെന്ന് എനിക്ക് അറിയില്ല. സുഹൃത്തുക്കള്‍ ഇട്ടേച്ച് പോയതിന്റെ വിഷമം എനിക്കുണ്ട്. പിന്നെ എന്റെ ഏറ്റവും നല്ല സുഹൃത്ത് ഭര്‍ത്താവ് ആണ്. അതുപോലെ അച്ഛനും അമ്മയുമൊക്കെ സുഹൃത്തുക്കളെ പോലെയാണ് കൂടെ നില്‍ക്കുന്നതെന്ന് നിമിഷ കൂട്ടിച്ചേര്‍ത്തു.