മിത്ത് വിവാദത്തിന്റെ പശ്ചാത്തലത്തില്‍ ‘ജയ് ഗണേഷ്’ എന്ന സിനിമ പ്രഖ്യാപിച്ചതോടെ അത് ചര്‍ച്ചകളില്‍ നിറയുകയാണ്. ഉണ്ണി മുകുന്ദനെ നായകനാക്കി രഞ്ജിത്ത് ശങ്കര്‍ ആണ് ചിത്രം ഒരുക്കുന്നത്. എന്നാല്‍ നിലവില്‍ നടക്കുന്ന മിത്ത് വിവാദവുമായി ജയ് ഗണേഷ് എന്ന ചിത്രത്തിന് ബന്ധമില്ലെന്ന് വ്യക്തമാക്കിയിരിക്കുകയാണ് രഞ്ജിത് ശങ്കര്‍ ഇപ്പോള്‍.
”ഇന്നലെ സിനിമയുടെ പ്രഖ്യാപനം മുതലുള്ള എല്ലാ വ്യാപകമായ വാര്‍ത്തകള്‍ക്കും അറുതി വരുത്താന്‍, പ്രസ്തുത വിവാദത്തിന് ഒരു മാസം മുമ്പേ കേരള ഫിലിം ചേംബറില്‍ ടൈറ്റില്‍ രജിസ്റ്റര്‍ ചെയ്തിരുന്നു” എന്നാണ് രഞ്ജിത് സോഷ്യല്‍ മീഡിയയില്‍ കുറിച്ചിരിക്കുന്നത്. പേര് രജിസ്റ്റര്‍ ചെയ്ത റെസീപ്റ്റും സംവിധായകന്‍ പങ്കുവച്ചിട്ടുണ്ട്.
ഒറ്റപ്പാലത്തെ ഗണേശോത്സവത്തില്‍ വച്ചായിരുന്നു ഉണ്ണി മുകുന്ദന്‍ സിനിമ പ്രഖ്യാപിച്ചത്. പിന്നാലെ സോഷ്യല്‍ മീഡിയയിലൂടെയും സിനിമ പ്രഖ്യാപിച്ചിരുന്നു. ഇതോടെയാണ് മിത്ത് വിവാദങ്ങളുമായി ബന്ധപ്പെടുത്തിയുള്ള ചര്‍ച്ചകള്‍ എത്തിയത്. സിനിമ പ്രഖ്യാപിച്ചപ്പോള്‍ തന്നെ ഈ യാത്ര വെല്ലുവിളി നിറഞ്ഞതായിരിക്കുമെന്ന് സംവിധായകന്‍ വ്യക്തമാക്കിയിരുന്നു.
”ജയ് ഗണേഷിന്റെ തിരക്കഥ പൂര്‍ത്തിയായ ശേഷം ഒരു നടനായി കാത്തിരിക്കുക ആയിരുന്നു. മാളികപ്പുറം എന്ന ചിത്രത്തിന് ശേഷം ഏഴ് മാസത്തോളം ചിത്രീകരണമൊന്നുമില്ലാതിരുന്ന കൃത്യമായ തിരക്കഥയ്ക്കായി കാത്തിരിക്കുക ആയിരുന്നു ഉണ്ണിയും. ഞങ്ങള്‍ ജയ് ഗണേഷിനെ കുറിച്ച് ചര്‍ച്ച ചെയ്തു.”
Read more
”അദ്ദേഹത്തിന് തിരക്കഥ ഇഷ്ടമായി. ഞാന്‍ എന്റെ നടനെയും കണ്ടെത്തി. ആവേശകരവും വെല്ലുവിളി നിറഞ്ഞതുമായ യാത്രയായിരിക്കും ഇത്. ഈ യാത്രയുടെ ഓരോ ഘട്ടവും ആസ്വാദകമാകുമെന്ന് പ്രതീക്ഷിക്കുന്നു” എന്നായിരുന്നു രഞ്ജിത്ത് ശങ്കര്‍ ഫെയ്‌സ്ബുക്കില്‍ കുറിച്ചത്.
