മലയാള സിനിമയിൽ വ്യത്യസ്തമായ സംഗീതം എപ്പോഴും പരീക്ഷിക്കുന്ന സംഗീതസംവിധായകനും ഗായകനുമാണ് സുഷിൻ ശ്യാം. ഒരുപാട് മികച്ച സൃഷ്ടികൾ സുഷിൻ മലയാളികൾക്ക് സമ്മാനിച്ചിട്ടുണ്ട്. ഇപ്പോഴിതാ സംഗീതജീവിതത്തെ പറ്റിയും പുതിയ പ്രോജക്ടുകളെ പറ്റിയും സംസാരിക്കുകയാണ് സുഷിൻ ശ്യാം.
ഇനി വരാനിരിക്കുന്നതിൽ ഏറ്റവും കൂടുതൽ എക്സൈറ്റ് ചെയ്യിക്കുന്ന രണ്ട് സിനിമകളാണ് ‘മഞ്ഞുമ്മൽ ബോയ്സും’, ‘ആവേശവും’ എന്നാണ് സുഷിൻ പറയുന്നത്. മാത്രമല്ല അത് തന്റെ സംഗീത ജീവിതത്തിൽ പ്രധാനപ്പെട്ട മാറ്റങ്ങൾ കൊണ്ടുവരുമെന്നാണ് സുഷിൻ പറയുന്നത്.
“ഇനി വരാനിരിക്കുന്നതിൽ എൻ്റെ ഏറ്റവും എക്സൈറ്റ്‌മെൻ്റ് തോന്നിപ്പിക്കുന്ന പ്രൊജക്റ്റുകളാണ് മഞ്ഞുമ്മൽ ബോയ്സും ആവേശവും. മഞ്ഞുമ്മൽ ബോയ്സ് മലയാളം ഇൻഡസ്ട്രിയുടെ സീൻ കുറച്ച് മാറ്റും. ഒരു ബിൽഡപ്പിന് വേണ്ടി പറയുകയല്ല. മ്യൂസിക്കിൻ്റെ കാര്യത്തിലും എനിക്ക് ഭയങ്കര എക്സൈറ്റ്മെന്റുണ്ട്. കുറച്ചധികം എഫേർട്ട് ഇടാനായി ഞാൻ പ്ലാൻ ചെയ്യുന്നുണ്ട്.
എന്റെ സൗണ്ട്സൊക്കെ മൊത്തത്തിൽ ഒന്ന് റീസെറ്റ് ചെയ്യണമെന്ന് ആഗ്രഹമുണ്ട്. 2023 തുടങ്ങുമ്പോൾ മൊത്തത്തിൽ എന്റെ സൗണ്ടിങ് ഒന്ന് മാറ്റിപിടിക്കണമെന്ന് ഞാൻ എന്നോട് തന്നെ പറഞ്ഞിരുന്നു. മഞ്ഞുമ്മൽ ബോയ്സ് മുതലാണ് അത് മാറാൻ പോകുന്നത് എന്നാണ് ഞാൻ പ്രതീക്ഷിക്കുന്നത്
എനിക്ക് പുതിയതായി എന്തെങ്കിലും ചെയ്യണമെന്നുണ്ട്. അതിലെ പാട്ട് ചെയ്തത് എന്തായാലും പുതിയ പരിപാടിയായി വന്നിട്ടുണ്ട്. പടമാണെങ്കിലും ഭയങ്കര രസമായിരിക്കും. ഒരു തിയേറ്റർ എക്‌സ്‌പീരിയൻസായിരിക്കും” എന്നാണ് ക്ലബ്ബ് എഫ്എമ്മിന് നൽകിയ അഭിമുഖത്തിൽ സുഷിൻ ശ്യാം പറഞ്ഞത്.
Read more
‘രോമാഞ്ചം’ എന്ന ചിത്രത്തിന് ശേഷം ജിത്തു മാധവൻ സംവിധാനം ചെയ്യുന്ന ഏറ്റവും പുതിയ ചിത്രമാണ് ‘ആവേശം’. ഫഹദ് ഫാസിലാണ് ചിത്രത്തിൽ കേന്ദ്ര കഥാപാത്രമായെത്തുന്നത്. ‘ജാനേമൻ’ എന്ന ചിത്രത്തിന് ശേഷം ചിദംബരം സംവിധാനം ചെയ്യുന്ന ചിത്രമാണ് ‘മഞ്ഞുമ്മൽ ബോയ്സ്’. സൗബിൻ ഷാഹിർ, ശ്രീനാഥ് ഭാസ ബാലു വർഗീസ്, ഗണപതി, ലാൽ ജൂനിയർ, അഭിറാം രാധാകൃഷ്‌ണൻ, ദീപക് പറമ്പോൽ, ഖാലിദ് റഹ്‌മാൻ, അരുൺ കുര്യൻ, വിഷ്‌ണു രഘു തുടങ്ങീ യുവതാരനിരയാണ് ചിത്രത്തിൽ അണിനിരക്കുന്നത്.
