മലയാള സിനിമയിലെ സൂപ്പര്‍ ഹിറ്റ് കൂട്ടുകെട്ടാണ് വിനീത് ശ്രീനിവാസനും നിവിന്‍ പോളിയും. ഇവര്‍ ഒന്നിച്ചെത്തിയ സിനിമകള്‍ എല്ലാം ഹിറ്റുകള്‍ ആയിരുന്നു. നിവിന്‍ പോളിക്കൊപ്പം വീണ്ടുമൊരു സിനിമ കൂടി ചെയ്യാന്‍ ആഗ്രഹമുണ്ടെന്ന് തുറന്നു പറഞ്ഞിരിക്കുകയാണ് വിനീത് ശ്രീനിവാസന്‍ ഇപ്പോള്‍.
ഞങ്ങള്‍ രണ്ടുപേര്‍ക്കും ആഗ്രഹമുണ്ട്. എന്നാല്‍ അങ്ങനെയൊരു പ്രോജക്റ്റ് ഒന്നും ഇതുവരെ പ്ലാന്‍ ചെയ്തിട്ടില്ല. അടുത്ത സിനിമയാണോ എന്നറിയില്ല, ഭാവിയില്‍ തീര്‍ച്ചയായും അതുണ്ടാവും. അത്തരമൊരു സിനിമയുമുണ്ടായാല്‍ ഹ്യൂമര്‍ പശ്ചാത്തലത്തിലാകും. തനിക്ക് നിവിന്റെ കൂടെ ഒരു സീരിയസ് പടം ചെയ്യുന്നത് ചിന്തിക്കാന്‍ വയ്യ.
നല്ല തമാശയുള്ള, ആളുകള്‍ക്ക് ചിരിച്ച് മറിയാന്‍ പറ്റുന്ന സിനിമയാകണമെന്നാണ് ആഗ്രഹം. പിന്നെ നിവിന്‍ ശക്തമായി തിരിച്ചുവരും. നിവിന്‍ ആണല്ലോ, അവന്‍ തിരിച്ചുവരും എന്നാണ് വിനീത് പറയുന്നത്. വിനീത് ആദ്യമായി സംവിധാനം ചെയ്ത ‘മലര്‍വാടി ആര്‍ട്‌സ് ക്ലബ്ബ്’ എന്ന ചിത്രത്തിലൂടെയാണ് നിവിന്‍ സിനിമയിലേക്ക് എത്തിയത്.
ഇരുവരും ‘തട്ടത്തിന് മറയത്ത്’ ഹിറ്റ് ആയിരുന്നു. നിവിന്റെ ‘ഒരു വടക്കന്‍ സെല്‍ഫി’ എന്ന ചിത്രത്തിന് വിനീത് ആണ് തിരക്കഥ ഒരുക്കിയത്. ‘മുകുന്ദനുണ്ണി അസോസിയേറ്റ്‌സ്’ എന്ന ചിത്രത്തിന്റെ സക്‌സസ് മീറ്റിലാണ് വിനീത് സംസാരിച്ചത്. അഭിനവ് സുന്ദര്‍ നായിക് സംവിധാനം ചെയ്ത ചിത്രം നവംബര്‍ 11ന് ആണ് തിയേറ്ററുകളില്‍ എത്തിയത്.
Read more
ചിത്രത്തിന്റെ രണ്ടാം ഭാഗം വരുമെന്നും വിനീത് പ്രസ് മീറ്റിനിടെയില്‍ പറഞ്ഞിരുന്നു. 2024 ല്‍ മുകുന്ദന്‍ ഉണ്ണി അസ്സോസിയേറ്റ്സിന്റെ രണ്ടാം ഭാഗം ചെയ്യാന്‍ അഭിനവിന് ആലോചനയുണ്ട്. മുകുന്ദനുണ്ണി വീണ്ടും വരും കുറച്ചുകൂടി ക്രൂരനായിട്ട് ആയിരിക്കുമോ എന്നറിയില്ല എന്തായാലും ആളുണ്ടാകും എന്നാണ് വിനീത് പറഞ്ഞത്.
