ഈയിടെ ഏറെ ചർച്ചയായ ഒന്നാണ് രജനികാന്ത് ചിത്രം ജയിലറും മലയാള ചിത്രം ജയിലറും. പേരിലെ സാമ്യത്തിന്റെ പേരിൽ ഇരുചിത്രങ്ങളും വലിയ രീതിയിൽ ചർച്ചാവിഷയമാവുകയും തമ്മിൽ തർക്കങ്ങൾ ഉണ്ടാവുകയും ചെയ്തിരുന്നു. ഒടുവിൽ തമിഴ് ജയിലറിനൊപ്പം തീയറ്ററിൽ എത്താനിരുന്ന ചിത്രം റിലീസ് മാറ്റിവെക്കുകയിരുന്നു. ഇപ്പോഴിതാ തന്റെ ജയിലർ കണ്ടവർക്ക് കാശ് തിരിച്ച കൊടുക്കാമെന്ന് ധ്യാൻ ശ്രീനിവാസൻ.

‘നദികളില്‍ സുന്ദരി യമുന’ എന്ന തന്റെ പുതിയ ചിത്രത്തിന്റെ പ്രസ് മീറ്റിനിടെയായിരുന്നു ധ്യാൻ ഇക്കാര്യം പറഞ്ഞത്. ധ്യാനിന്റെ സിനിമയാണെന്ന് കരുതി ജയിലർ കാണാൻ പോയ കുറേ കുടുംബങ്ങളുണ്ട് എന്ന് മാധ്യമപ്രവർത്തകർ പറഞ്ഞപ്പോഴാണ് ‘അത് ഞാനറിഞ്ഞില്ല. അവരുടെ കാശ് തിരിച്ച് കൊടുക്കാൻ ഞാൻ തയ്യാറാണ്’ എന്ന് ധ്യാൻ തമാശ രൂപേണ പറഞ്ഞത്.

അതുകൂടാതെ തന്റെ അഭിമുഖങ്ങൾ കണ്ട ആരും സിനിമ കാണാൻ പോകരുത് എന്നും ധ്യാൻ ശ്രീനിവാസൻ കൂട്ടിച്ചേർത്തു. സിനിമ പുറത്തിറങ്ങി റിപ്പോർട്ടുകൾ അറിഞ്ഞതിന് ശേഷം മാത്രമേ സിനിമയ്ക്ക് പോകാവൂ എന്നാണ് ധ്യാൻ പറയുന്നത്. തനിക്ക് വലിയൊരു നടനായി പേരെടുക്കണം എന്ന ആഗ്രഹം ഇല്ലെന്നും ധ്യാൻ പറഞ്ഞു.

‘രണ്ട് വര്‍ഷത്തിനിടെ ചെയ്ത സിനിമകളില്‍ താൻ ഏറ്റവും കൂടുതല്‍ വ്യക്തിപരമായി പുഷ് ചെയ്തത് ഉടല്‍ എന്ന സിനിമയാണ് എന്നും ധ്യാൻ പറയുന്നു. ആ സിനിമയ്ക്ക് ഒരു ക്വാളിറ്റിയുണ്ടെന്ന് ഉറപ്പുണ്ടായിരുന്നു. അതിനു ശേഷം ഞാന്‍ പുഷ് ചെയ്യാന്‍ പോകുന്ന സിനിമയായിരിക്കും ‘നദികളില്‍ സുന്ദരി യമുന’ എന്ന് താരം പറയുന്നു.