ട്രാഫിക് നിയമങ്ങള്‍ തെറ്റിച്ച് കാര്‍ ഓടിച്ചതിന്റെ പേരില്‍ അറസ്റ്റിലായ കാമുകന് പിന്തുണയുമായി നടി ശാലിന്‍ സോയ. യൂട്യൂബര്‍ ടിടിഎഫ് വാസന്‍ ആണ് ശാലിന്റെ കാമുകന്. വാസന്‍ തന്നെയായിരുന്നു തങ്ങള്‍ പ്രണയത്തിലാണെന്ന വിവരം യൂട്യൂബിലൂടെ വ്യക്തമാക്കിയത്.
അശ്രദ്ധമായി കാര്‍ ഓടിച്ചതും വാഹനം ഓടിക്കുന്നതിനിടെ മൊബൈല്‍ ഫോണില്‍ സംസാരിച്ചതും ഉള്‍പ്പെടെയുള്ള കേസുകളിലാണ് വാസന്‍ ഇപ്പോള്‍ അറസ്റ്റിലായിരിക്കുന്നത്. എന്നാല്‍ ഏത് പ്രതിസന്ധിയിലും തളരാതെ ഇരിക്കണമെന്നും താന്‍ എപ്പോഴും കൂടെ ഉണ്ടാകുമെന്നുമാണ് വാസന്റെ കൈ പിടിച്ചു കൊണ്ടുള്ള ചിത്രം പങ്കുവച്ച് ശാലിന്‍ ഇന്‍സ്റ്റഗ്രാമില്‍ കുറിച്ചിരിക്കുന്നത്.
”എനിക്ക് ഏറ്റവും പ്രിയപ്പെട്ടവനെ, നീ ധൈര്യമായിരിക്കുക. ഞാന്‍ എപ്പോഴും നിന്നോടൊപ്പമുണ്ടാകും. എനിക്കറിയാവുന്നവരില്‍ ഏറ്റവും നല്ല വ്യക്തി നീയാണ്. ഇപ്പോള്‍ സംഭവിക്കുന്നതിനൊന്നും നീ അര്‍ഹനല്ലെന്ന് എനിക്കറിയാം. പക്ഷേ എപ്പോഴും നീ പറയാറുള്ളത് പോലെ ഞാന്‍ നിന്നോട് പറയുന്നു ‘നടപ്പതെല്ലാം നന്മക്ക്, വിടു പാത്തുക്കലാം” എന്നാണ് ശാലിന്റെ കുറിപ്പ്.
ആറ് വകുപ്പുകള്‍ ചുമത്തിയാണ് യൂട്യൂബര്‍ക്കെതിരെ കേസ് എടുത്തിരിക്കുന്നത്. മധുര വഴി തൂത്തുക്കുടിയിലേക്ക് പോകുന്ന വഴി യൂട്യൂബര്‍ ഫോണില്‍ സംസരിച്ചുകൊണ്ട് വാഹനമോടിച്ച് പൊതുജനങ്ങള്‍ക്ക് അപകടകരമാം വിധം വണ്ടി ഓടിക്കുകയും ആ വീഡിയോ സോഷ്യല്‍ മീഡിയയില്‍ പങ്കുവയ്ക്കുകയും ചെയ്തു എന്നാണ് കേസ്.
നാല്‍പതു ലക്ഷത്തിലധികം സബ്‌സ്‌ക്രൈബേഴ്സ് ഉള്ള യൂട്യൂബ് സെലിബ്രിറ്റി ആണ് ടിടിഎഫ് വാസന്‍. ബൈക്ക് സ്റ്റണ്ട് റീല്‍ ചെയ്യുന്നതിനിടെ അപകടം സംഭവിച്ചതോടെ കഴിഞ്ഞ വര്‍ഷം വാസനെ അറസ്റ്റ് ചെയ്ത് ഡ്രൈവിങ് ലൈസന്‍സ് കോടതി താല്‍ക്കാലികമായി റദ്ദാക്കിയിരുന്നു.
