കണ്ണൂർ പയ്യാമ്പലത്തെ ഭാനൂസ് ബീച്ച് എൻക്ലേവ് റിസോർട്ടിൽ വസ്തു കത്തിച്ച് ജീവനക്കാരൻ ആത്മഹത്യ ചെയ്തു. മരിച്ച പാലക്കാട് സ്വദേശി പ്രേമൻ 12 വർഷത്തിലേറെയായി റിസോർട്ടിൻ്റെ കെയർടേക്കറായി ജോലി ചെയ്തു വരികയായിരുന്നു. ജോലിയിൽ നിന്ന് പിരിച്ചുവിടുമെന്ന് അറിയിച്ചതിനെ തുടർന്നുണ്ടായ വൈരാഗ്യമാണ് സംഭവത്തിൽ കലാശിച്ചതെന്നാണ് റിപ്പോർട്ടുകൾ.
ഞെട്ടിപ്പിക്കുന്ന തരത്തിൽ താഴത്തെ നിലയിലെ ഗ്യാസ് സിലിണ്ടർ തുറന്ന് ചുറ്റും പെട്രോൾ ഒഴിച്ച് പ്രേമൻ രണ്ട് വളർത്തു നായ്ക്കളെ മുറിയിൽ പൂട്ടിയിട്ട ശേഷം തീകൊളുത്തുകയായിരുന്നു. റിസോർട്ടിലെ താമസക്കാർ ഉടൻ തന്നെ ഫയർഫോഴ്‌സിനെ വിവരമറിയിക്കുകയും തീ നിയന്ത്രണ വിധേയമാക്കുകയും ചെയ്തു.
Read more
തൊട്ടുപിന്നാലെ റിസോർട്ടിന് സമീപത്തെ പൂട്ടിയിട്ട വീടിൻ്റെ കിണറ്റിൽ പ്രേമനെ തൂങ്ങിമരിച്ച നിലയിൽ കണ്ടെത്തി. റിസോർട്ടിന് തീയിട്ടതിനെ തുടർന്ന് ഇയാൾക്കും പൊള്ളലേറ്റിരുന്നു. സംഭവത്തിൽ പോലീസ് അന്വേഷണം ആരംഭിച്ചു. മേയർ ഉൾപ്പെടെയുള്ള ഉദ്യോഗസ്ഥർ സ്ഥലം സന്ദർശിച്ചു. വാരം സ്വദേശി വിജിലിൻ്റെ ഉടമസ്ഥതയിലുള്ളതാണ് റിസോർട്ട്. താഴത്തെ നിലയിലെ ഒരു മുറി പൂർണമായും കത്തിനശിച്ചു. ഭാഗ്യവശാൽ, സംഭവത്തിൽ മറ്റാർക്കും പരിക്കില്ല.
