ശ്രീനാഥ് ഭാസി ഷെയിന്‍ നിഗം എന്നിവരെ സിനിമ സംഘടനകള്‍ സിനിമകള്‍ ചെയ്യുന്നതില്‍ നിന്ന് വിലക്കിയതില്‍ പ്രതികരണവുമായി ലുക്മാന്‍ അവറാന്‍. കലാകാരന്മാരെ വിലക്കാനാകില്ലെന്നും ഭൂമിയുള്ള കാലത്തോളം അവര്‍ക്ക് അവസരങ്ങള്‍ ലഭിക്കുമെന്നും ലുക്മാന്‍ പറഞ്ഞു.
‘കലാകാരന്മാരെ വിലക്കാനാവില്ല. അവര്‍ക്ക് പല അവസരങ്ങളും ലഭിച്ചു കൊണ്ടേയിരിക്കും. വ്യക്തിപരമായിട്ടോ സംഘടനാപരമായോ തീരുമാനങ്ങള്‍ എടുക്കാം. കലാകാരന്മാര്‍ക്ക് അടച്ചിട്ടില്ല വാതിലുകള്‍ ഇല്ല. ഭൂമി ഉള്ളിടത്തോളം അവര്‍ക്ക് അവസരങ്ങള്‍ കിട്ടിക്കൊണ്ടേയിരിക്കും.
ഇപ്പോള്‍ നടക്കുന്ന വിവാദങ്ങളുമായി ബന്ധപ്പെട്ട് കൂടുതല്‍ കാര്യങ്ങള്‍ ഒന്നും എനിക്ക് അറിയില്ല. ഈ പറഞ്ഞ ആര്‍ട്ടിസ്റ്റുകളുമായി ഞാന്‍ ഒന്നോ രണ്ടോ സിനിമകള്‍ ചെയ്തിട്ടുണ്ട്. അവിടെ അങ്ങനത്തെ ഒരു പ്രശ്‌നമൊന്നും ഉണ്ടായിട്ടില്ല. എന്നാണ് ലുക്മാന്‍ പറയുന്നത്.
Read more
ജാക്‌സണ്‍ ബസാര്‍ യൂത്ത് എന്ന ചിത്രമാണ് ലുക്മാന്റേതായി റിലീസിന് ഒരുങ്ങുന്നത്. ഷമല്‍ സുലൈമാന്‍ സംവിധാനം ചെയ്യുന്ന ചിത്രത്തില്‍, ജാഫര്‍ ഇടുക്കി, ഇന്ദ്രന്‍സ്, ചിന്നു ചാന്ദിനി, ഫാഹിം സഫര്‍, അഭിരാം രാധാകൃഷ്ണന്‍ എന്നിവര്‍ കേന്ദ്ര കഥാപാത്രങ്ങളായി എത്തുന്നു. ക്രോസ് ബോര്‍ഡര്‍ ക്യാമറയുടെ ബാനറില്‍ സക്കരിയ നിര്‍മ്മിക്കുന്ന ചിത്രത്തിന്റെ ഛായാഗ്രഹണം കണ്ണന്‍ പട്ടേരി നിര്‍വഹിക്കുന്നു. അപ്പു എന്‍ ഭട്ടത്തിരി, ഷൈജാസ് കെഎം എന്നിവര്‍ എഡിറ്റിംഗ് നിര്‍വഹിക്കുന്ന ചിത്രത്തിന്റെ സംഗീതവും പശ്ചാത്തല സംഗീതവും ഗോവിന്ദ് വസന്തയാണ് ഒരുക്കിയിരിക്കുന്നത്.
